აშშ-ის პრეზიდენტის ბარაკ ობამას განცხადებით, ვაშინგტონი ყველა ქვეყანასთან ითანამშრომლებს სირიაში არსებული კრიზისის გადაჭრის მიზნით, მათ შორის რუსეთთან და ირანთან. ნიუ-იორკში, გაეროს გენერალურ ასამბლეაზე გამოსვლისას მან
ხაზი გაუსვა, რომ სირიაში შეუძლებელი იქნება ვითარება ომამდელ სტატუს-კვოს დაუბრუნდეს
ამდენი ნგრევისა და სისხლისღვრის შემდეგ.
აშშ-ის პრეზიდენტმა სირიის პრეზიდენტ ბაშარ ალ-ასადს ტირანი უწოდა და განაცხადა, რომ ასადი არ უნდა გააძლიეროს ძალისხმევამ, რომელიც ექსტრემისტული ჯგუფის, „ისლამური სახელმწიფოს“ წინააღმდეგაა მიმართული.
ობამამ ასევე თქვა, რომ მსოფლიო განზე ვერ გადგება იმ დროს, როცა რუსეთი არღვევს უკრაინის მთლიანობას და სუვერენიტეტს. ობამას თქმით, ვაშინგტონს არ სურს რუსეთის იზოლირება. აშშ-ის პრეზიდენტმა განაცხადა, რომ სურს რუსეთი იყოს ძლიერი და ჩაერთოს დიპლომატიურ ძალისხმევაში, რათა კრიზისი გადაიჭრას ისე, რომ უკრაინას მიეცეს საკუთარი მომავლის განსაზღვრის საშუალება.
