ნიუ-იორკში აშშ-ისა და რუსეთის პრეზიდენტების ორმხრივი შეხვედრა გაიმართა. პირისპირ შეხვედრა, რომელიც გაეროს შტაბბინაში, ე.წ. რუსულ ოთახში გაიმართა, დაგეგმილი 45 წუთის ნაცვლად საათზე მეტხანს გაგრძელდა.
მოლაპარაკებების დასრულების შემდეგ, ვლადიმერ პუტინმა ჟურნალისტებთან განაცხადა, რომ მხარეებმა სირიაში არსებული ვითარება, რუსეთისა და აშშ-ის როლი კონფლიქტის დარეგულირებაში, ასევე უკრაინის აღმოსავლეთში მიმდინარე კონფლიქტი განიხილეს. რუსეთის პრეზიდენტმა აღნიშნა, რომ საუბარი კონსტრუქციული იყო და გამოინახა შეხების წერტილები გარკვეულ საკითხებთან მიმართებაში. მისი თქმით, მოსკოვი მზად არის, ვაშინგტონთან ურთიერთობა დაალაგოს.
ვლადიმერ პუტინმა ხაზგასმით აღნიშნა, რომ რუსეთის არმია სირიაში სახმელეთო ოპერაციაში არ ჩაერთვება.
რაც შეეხება აშშ-ის პრეზიდენტს, მას შეხვედრის შემდეგ ჟურნალისტებთან არ უსაუბრია. თეთრი სახლის წარმომადგენლის ინფორმაციით კი, შეხვედრაზე ბარაქ ობამამ შეშფოთება გამოთქვა დონეცკისა და ლუგანსკის თვითაღიარებულ რესპუბლიკებში დაგეგმილი ე.წ. ადგილობრივი არჩევნების გამო.
