უკრაინის პრემიერ-მინისტრის დანიშვნის პროცედურის დაწყების აუცილებელი პირობა კანიდატის პირადი თანხმობაცაა, - ამის შესახებ პეტრო პოროშენკო პრეზიდენტის ოფიციალურ ვებგვერდზე იმ პეტიციის საპასუხოდ აცხადებს (31 ათასი ხელმოწერა), რომლის თანახმადაც მოსახლეობა უკრაინის პრემიერად მიხეილ სააკაშვილს უჭერს მხარს.

პოროშენკო განცხადებაში პრემიერ-მინისტრის გადაყენებისა და დანიშვნის პროცედურებზე საუბრობს. მისი განმარტებით, უკრაინის კონსტიტუციის თანახმად, მოქმედი პრემიერ-მინისტრის გადაყენება ქვეყნის პირველი პირის ინიციატივით ან უმაღლესი რადას დეპუტატთა 2/3-ის მოთხოვნითაა შესაძლებელი. ხოლო მინისტრთა კაბინეტს უნდობლობას პარლამენტის საკონსტიტუციო უმრავლესობა უცხადებს.
უკრაინის მინისტრთა კაბინეტის პასუხისმგებლობის საკითხის დაყენება უკრაინის მინისტრთა კაბინეტის საქმიანობის პროგრამის დამტკიცებიდან ერთ წელიწადშია შესაძლებელი.
,,გამომდინარე იქიდან, რომ უმაღლესმა რადამ აღნიშნული პროგრამა 2014 წლის 11 დეკემბერს დაამტკიცა, დეპუტატები იაცენიუკის მთავრობის პასუხისმგებლობის საკითხს 2015 წლის 11 დეკემბრამდე ვერ განიხილავენ. გარდა ამისა, უკრაინის პრემიერ-მინისტრის დანიშვნის პროცედურის დაწყების აუცილებელი პირობა კანდიდატის პირადი თანხმობაა. თუმცა, სააკაშვილს აღნიშნულ საკითხზე არაფერი უთქვამს", - ნათქვამია განცხადებაში.