რიყის ტერიტორიისა და "ტელეიმედის" გასხვისების თაობაზე დავით კეზერაშვილისა და გიგი უგულავას წინააღმდეგ სისხლის სამართლის საქმეზე მოსამართლე ლაშა ჩხიკვაძემ გიგი უგულავას მიმართ გამამტყუნებელი განაჩენი გამოიტანა, დავით კეზერაშვილი კი გაამართლა და პატიმრობა გაუუქმა. გიგი უგულავას 4 წელი და 6 თვე შეეფარდა.
2016 წელი არის ივანიშვილის ხელისუფლებაში ყოფნის მაქსიმალური ვადა" - ამ სიტყვებით მიმართა გიგი უგულავამ განაჩენის გამოცხადების შემდეგ სასამართლოსთან შეკრებილ მხარდამჭერებს.
„ჩვენ ბეჭებზე დავდეთ ივანიშვილი და მისი უმეცარი ხელისუფლება, ეს ორი დღე მთელ საქართველოს დაუდასტურეს, რომ მათ ქვეყანაში არსებული პრობლემები არ ანაღვლებთ გარდა იმისა, რომ პოლიტიკური ოპონენტები ჰყავდეთ ციხეში, სხვანაირად ვერ აიხსნება ის აღვირახსნილი ისტერია,“ - განაცხდა გიგი უგულავამ.
უგულავა და მისი ადვოკატები, ასევე მისი ახლობლები და თანაგუნდელები სასამართლოს გადაწყვეტილების გამოცხადებას სხდომათა დარბაზში არ დასწრნენ.
"მოსამართლის გადაწყვეტილებას დაველოდები ეზოში. არ ვაპირებ დარბაზში შესვლას, არ ვაპირებ ასევე მოვისმინო განაჩენი, რომელსაც ემოციური ინტერესი არ აქვს, რადგან წინასწარ როცა იცი, ადრენალინი არ არის. არ მინდა, რომ დარბაზში ექსცესები მოჰყვეს განაჩენის გამოტანას. განაჩენის გამოცხადების შემდეგ მანდატურს ვთხოვ, რომ მოვიდეს ჩემთან, ყურში მითხრას, ამის შემდეგ დავემშვიდობები ხალხს და მარტო შევალ დარბაზში", - განაცხადა უგულავამ.
სასამართლო პროცესზე გიგი უგულავამ საბოლოო სიტყვის წარმოთქმაზე უარი განაცხადა.
"ეს საქმე დამთავრდება ბრალდებულის საბოლოო სიტყვის გარეშე. ჩემი თავმოყვარეობა არ მაძლევს უფლებას, რომ ფორმალურად ვთქვა საბოლოო სიტყვა. არც დროის გაწელვას ვაპირებ. შემეძლო, აცილებები მომეთხოვა და სხვადასხვა საპროცესო ნორმა გამომეყენებინა, სხდომა 18:00 საათამდე, ანუ სამუშაო დროის ამოწურვამდე გამეწელა, მაგრამ ამას არ გავაკეთებ. რა გადაწყვეტილებაც გინდა ის მიიღეთ", - განაცხადა უგულავამ.
მისი თქმით, თუ ვინმეს აქვს განცდა, რომ მას ეშინია, ასე არ არის. ამასთან, უგულავამ მოსამართლეს მიმართა, რომ საბოლოო სიტყვის მოსამზადებლად ერთკვირიანი ვადის განსაზღვრის შუამდგომლობის დაუკმაყოფილებლობით არასწორი და არაადამიანური გადაწყვეტილება მიიღო.
