თურქეთი, რომელსაც დასავლეთთან მჭიდრო ურთიერთობა აქვს, ტერორისტულ ორგანიზაციებს, „ჯაბჰატ ან-ნუსრას“ და „ისლამურ სახელმწიფოს“ ფულით, იარაღითა და მოხალისეებით ამარაგებს. ამის შესახებ რუსი ჟურნალისტებისთვის მიცემულ ინტერვიუში სირიის პრეზიდენტმა განაცხადა. „ერდოგანი და დავიდოღლუ ვაშინგტონის დაუკითხავად ნაბიჯსაც არ დგამენ. შესაბამისად, თურქეთი ტერორისტებს დასავლეთის ბრძანებით ეხმარება. ტერორიზმი დასავლეთისთვის ერთგვარი კოზირია, რომელსაც პერიოდულად იყენებენ, თუმცა ისლამური სახელმწიფო კონტროლიდან გაექცათ. ამიტომ, მათ წინააღმდეგ ჯაბჰატ-ან-ნუსრა დარაზმეს. ეს იმას არ ნიშნავს, რომ მათ ისლამური სახელმწიფოს განადგურება სურთ. ეს რომ სურდეთ, ამას უკვე გააკეთებდნენ,“-აღნიშნა ასადმა.
