“ნორმანდიის ფორმატში“ ლეგიტიმური სახელმწიფოების ლეგიტიმური წარმომადგენლები მართავენ შეხვედრას და მასში უკანონო სტრუქტურების ადგილი არ არის. ამის შესახებ გერმანიის საგარეო უწყების ოფიციალურმა წარმომადგენელმა მარტინ შეფერმა განაცხადა.
„მოლაპარაკებების მაგიდასთან სხედან ლეგიტიმური სახელმწიფოების ლეგიტიმური წარმომადგენლები და ცდილობენ იპოვონ გადაწყვეტილებების გზები“, - განაცხადა შეფერმა და დასძინა, რომ „ რუსეთის გარდა, სეპარატისტები ლეგიტიმურ სახელმწიფოდ არავის უღიარებია “.
მან ასევე აღნიშნა, რომ სეპარატისტული რეგიონების წარმომადგენლებთან ფორმალური ურთიერთობისთვის შექმნილია საკონტაქტო ჯგუფი.
„ამ ჯგუფს სახელმწიფო ფორმატის გარეშე შეუძლია გადაწყვიტოს პრაქტიკული საკითხები“, - განაცხადა დიპლომატმა.
შეფერმა აღნიშნა, რომ „ნორმანდიის ფორმატის“ საგარეო საქმეთა მინისტრების მეშვიდე შეხვედრა, რომელიც ბერლინში გაიმართება, მიმართულია უკრაინის აღმოსავლეთში მიმდინარე კონფლიქტის პოლიტიკური მოგვარებისკენ.
