”ლარის კურსის გაუფასურებით, გიორგი ქადაგიძე ცდილობს, რომ ხალხის სოციალური ბუნტი გამოიწვიოს და ეს ყველაფერი ხელისუფლების წინააღმდეგ მიმართოს”, - აღნიშნულის შესახებ განცხადებას სააგენტო ”ჯი-ეიჩ-ენთან” ექსპერტი ეკონომიკის საკითხებში პაატა აროშიძე აკეთებს.
როგორც აროშიძე ამბობს, გიორგი ქადაგიძე პოლიტიკურ დაკვეთას ასრულებს.
”ერთი კვირის წინ საქართველოს ეროვნული ბანკის პრეზიდენტი გამოვიდა და განაცხადა, რომ ის საგარეო ფაქტორები, რომელიც ზემოქმედებას ახდენდა ლარზე, მთლიანად აღმოფხვრილია და ლარის კურსი დასტაბილურდებოდა. თუმცა, ამის შემდეგ გავიდა დღეები და ვხედავთ, რომ მაგალითად - გუშინ ზოგიერთი კომერციული ბანკის გაცვლითი კურსით, 1 დოლარის ღირებულება 2,47 ლარიც კი იყო. მაგალითად - ”პროკრედიტ ბანკის” კურსი 2,475 ლარი იყო, მაშინ როდესაც ”ლიბერთი ბანკში” დოლარის კურსი 2,43 ლარი იყო. რა მოხდა ამ ერთი კვირის განმავლობაში? თუ ამბობენ, რომ საგარეო ფაქტორები მოხსნილია, გამოდის, რომ ამ ერთ კვირაში რაღაც უარყოფითი მაკროეკონომიკური შოკი მოხდა, რამაც ლარის კურსი მინიმუმ 7 პუნქტით გააუფასურა. ამიტომ, შეიძლება თამამად ვიფიქროთ, რომ ეს არის წმინდა ხელოვნური პროცესი, რომელსაც სებ-ის იწვევს, - აცხადებს აროშიძე.
მისივე თქმით, თამაზ მეჭიაური განცხადებები, რომელიც შეეხებოდა სებ-ის კანონპროექტზე პრეზიდენტის ვეტოს უარყოფით გავლენას ლარის კურსზე - სულ სხვა თემაა.
,,ის რომ პრეზიდენტმა განაცხადა, რომ ის პატივს სცემს პარლამენტის გადაწყვეტილებას და საბანკო ზედამხედველობის სებ-იდან გამოტანის კანონპროექტს ხელს მოაწერს, ამას ლარის კურსზე დიდი გავლენა არ მოუხდენია. თუ პროცესები ხელოვნურად მართული არ არის, რასთან გვაქვს საქმე? საქმე გვაქვს იმასთან, რომ სებ-ის პრეზიდენტი გიორგი ქადაგიძე ცდილობს, რომ ხალხის სოციალური ბუნტი გამოიწვიოს და ეს ყველაფერი ხელისუფლების წინააღმდეგ მიმართოს. ეს ყველაფერი პოლიტიკური პროცესებია”- აცხადებს ექსპერტი.
პაატა აროშიძის თქმით, შექმნილ სიტუაციაში საკუთარი პასუხისმგებლობა ეკისრება მთავრობასაც, თუმცა მთავრობა ამას ვეღარ ახერხებს.
”მაშინ, როდესაც ”საქსტატი” აქვეყნებს ინფორმაციას, რომ ინვესტიციები წინა წელთან შედარებით გაიზარდა, არც თუ ისეთი ეკონომიკური წინსვლები არ გაქვს, მაგრამ არც ეკონომიკური ვარდნას არ აქვს ადგილი, რომ 3-4 დღის განმავლობაში ლარის კურსი 7 პუნქტით გაუფასურდეს. ამ ყველაფერში სებ-ის ბრალეულობა იკვეთება. კი მთავარობასაც თავისი როლი აქვს ამ საკითხში. არ შეიძლება მთავრობის ეკონომიკური გუნდი ცალკე გამოვყოთ. მან ყველაფერი უნდა გააკეთოს, რომ ხელი შეუწყოს ლარის გამყარებას, მაგრამ უკვე ვხედავთ, რომ ეს ვერ ხერხდება. ცხადია, რომ კურსი 3-4 დღის განმავლობაშიც ვერ ნარჩუნდება, რაც ცხადია ვიღაცეების ინტერესშია” - აცხადებს აროშიძე.
დღეს, სავალუტო ჯიხურებში დოლარის ყიდვა 2.44 -2.48 ლარის ფარგლებშია შესაძლებელი. რაც შეეხება გასაყიდ ფასს, ვალუტის გადამცვლელი ჯიხურები დოლარს 2.38-დან 2.41 ლარის ფარგლებში იბარებენ.
