თურქეთის საკურორტო ქალაქ ალანიაში გვიან ღამე შეტაკებები მოხდა. ადგილობრივი მედიის ცნობით, რამდენიმე რესტორანსა და ღამის კლუბს ცეცხლიც გაუჩნდა.
ბოლო ინფორმაციით, თურქეთის მასშტაბით დარბეულია ქურთების პარტიის ოფისები, მათი მომხრე მედია საშუალებები და ქურთების კუთვნილი მაღაზიები. ქურთების პარტიის ლიდერი ქვეყანას სამოქალაქო ომის შესახებ აფრთხილებს.
მსხვერპლის შესახებ ინფორმაცია არ ვრცელდება.
არეულობა ალანიაში მას შემდეგ დაიწყო, რაც "ქურთების მუშათა პარტიის" მებრძოლებმა 14 სამართალდამცველი მოკლეს. მომხდარის შემდეგ ნაციონალისტები თავს დაესხნენ ქურთების მხარდამჭერი პარტიის ოფისს ალანიაში. ქალაქში მდებარე ბარებსა და რესტორნებში დასაქმებულები ძირითადად ქურთები არიან.
ამ დრომდე უცნობია რამდენი ქართველი რჩება თურქეთის კურორტებზე. ქვეყნის სამხრეთით ადგილობრივების გარდა თავისუფლად გადაადგილება შეზღუდული აქვთ იმ ქართველებსაც, რომლებიც ამ დროისთვის ანტალიის პროვინციაში სამუშაო ან ტურისტული მიზნით იმყოფებიან. მათი თქმით, ისინი უსაფრთხოების გამო ქალაქში სიარულს ერიდებიან.
