სახელმწიფოს მხრიდან ყურძნის შეძენის სუბსიდირების საკითხი პოლიტიკას უკავშირდება და მას ეკონომიკური ეფექტი არ გააჩნია, - მიიჩნევს ეროვნული ბანკის ყოფილი პრეზიდენტი რომან გოცირიძე.
გოცირიძე აცხადებს, რომ სახელმწიფოს მხრიდან ყურძნის შეძენა არ არის გლეხებზე ზრუნვა, რეალურად - ხელისუფლების გადაწყვეტილება მომავალ არჩევნებს უკავშირდება: „არჩევნებზე ფიქრობენ, რომ კიდევ ერთი ციკლი თბილად მოკალათდნენ“.
«აბსურდული ისტორია! გლეხს მოჰყავს ყურძენი, რომელსაც ვერ ჰყიდის, ანუ არავის სჭირდება. ჰუმანური სახელმწიფო იღებს გადაწყვეტილებას, რომ იყიდოს მისგან ეს საქონელი, თუმცა მასაც არაფერში სჭირდება. ყურძენი მალეფუჭებადია, ამიტომ სახელმწიფო სასწრაფოდ გადააქცევს მას ღვინოდ-სპეციალურად ამ მიზნით აშენებულ ქარხნებში ან კერძო საწარმოებს ჩამოურიგებს ყურძენს და შეუკვეთავს სახელმწიფო ღვინის წარმოებას. სახელმწიფოს ღვინოც არაფერში სჭირდება. ის უარესი ხარისხისაა და არც ვაჭრობა ეხერხება, ღვინო კი მალე ძმარდება. ამიტომ, დამატებითი ხარჯების მიუხედავად, მას აქცევს სახელმწიფო სპირტად. უკეთესად ინახება. კი, შენახვასაც ხარჯები აქვს, დანაკარგებიც, მაგრამ ძმარს მაინც სჯობია. ერთ დროს შეიძლება გაყიდოს. ძმრისფასად, რა თქმა უნდა, რადგან ბაზარზე მსგავსი პროდუქცია (განსაკუთრებით უცხოური), გაცილებით იაფი ღირს, ვიდრე სახელმწიფო საქონელი. სახელმწიფოს ხომ არ ადარდებს მისი დანახარჯები. სინამდვილეში ეს ფული მისი ხომ არ არის. იგი ე.წ. გადასახადების გადამხდელებისაა. -იქნებ უკეთესი იყო, არ გამოეხადა სპირტი და გაეყიდა ძმრად? რა თქმა უნდა კი! -იქნებ უკეთესი იყო, რომ არ მიეყვანა საქმე დაძმარებამდე და გაეყიდა როგორც ყურძენი? რა თქმა უნდა კი! -იქნებ უკეთესი იყო, გლეხს არ ეწარმოებინა ყურძენი და პირდაპირ ეჩუქნა ფული მისთვის სახელმწიფოს არწარმოებისათვის? რა თქმა უნდა კი. დაიზოგებოდა რესურსები! სწორედ ამას აკეთებენ ევროკავშირში, რომლის მაგალითად მოყვანა ასე უყვართ სუბსიდირების გასამართლებლად. ესაა აბსურდის ეკონომიკა. ევროკავშირშიც, რა თქმა უნდა. ეს მახინჯი ტრადიცია მრავალი ათეული თუ უფრო მეტი წლების განმავლობაში ყალიბდებოდა ამ ქვეყნებში და მის ეტაპობრივად მოშლას ცდილობენ ახლა. ძალიან ძნელია. პოლიტიკურადაც, ანუ ელიტების კეთილდღეობასაც ეხება ეს და ვერ ბედავენ ამ აბსურდიდან სწრაფად გამოსვლას. ჩვენ კი გვინდა, რომ მასში შევყოთ თავი. გლეხებზე ზრუნავენ? სულ ფეხებზე ჰკიდიათ. არჩევნებზე ფიქრობენ, რომ კიდევ ერთი ციკლი თბილად მოკალათდნენ», - აცხადებს რომან გოცირიძე.
