ჩვენ უნდა დავამყაროთ ხანგრძლივი მშვიდობა, რომელიც დაეყრდნობა სიძლიერეს და პრაქტიკულ ურთიერთობას ჩვენს მეზობელ ქვეყნებთან, განსაკუთრებით კი, რუსეთთან, - ამის შესახებ საქართველოს პრემიერ-მინისტრმა საერთაშორისო კონფერენციაზე "ევროპის ახალი გეოპოლიტიკური ლანდშაფტი: უსაფრთხოება, ეკონომიკური შესაძლებლობები, თავისუფლება და ადამიანური ღირსება ფრონტისპირა ქვეყნებში" სიტყვით გამოსვლისას განაცხადა.
პრემიერმა საქართველოში განხორციელებულ რეფორმებზე ისაუბრა და ასევე ხაზი გაუსვა მშვიდობის დამყარების სურვილს მეზობლებთან.
"მას შემდეგ, რაც ხელისუფლებაში მოვედით, შევქმენით მართვის სისტემა, რომელიც უფრო ღიაა და ანგარიშვალდებული ხალხის წინაშე. ჩვენ, აგრეთვე, გავაძლიერეთ დემოკრატია ხელისუფლების შტოებს შორის რეალური ანგარიშვალდებულების დამკვიდრებით და ძალის დეცენტრალიზაციით ადგილობრივი ხელისუფლების სასარგებლოდ. ეს ხელისუფლება ორიენტირებულია საკითხებზე, რომლებიც რიგით ქართველებს ეხება. ძლიერი დემოკრატიის მშენებლობის გარდა, არსებობს სამი ძირითადი მიმართულება, რაზეც ყურადღება გვაქვს გამახვილებული. პირველ რიგში, ჩვენ ვცდილობთ, გავზარდოთ ჩვენი ეკონომიკა, რათა უფრო მეტი სამუშაო ადგილი შევქმნათ უფრო მეტი ადამიანისათვის, უკეთესი ანაზღაურებით. ჩვენ ვახდენთ ინვესტირებას მცირე ბიზნესისა და სოფლის მეურნეობის სექტორებში. ჩვენ ვაშენებთ უკეთეს გზებს, ხიდებს და პორტებს, რათა გადავზიდოთ ჩვენი საქონელი და სრული ინტეგრაცია მოვახდინოთ გლობალურ ეკონომიკაში. ეს მთავრობა საქართველოს უნიკალურ ადგილმდებარეობას იყენებს იმისათვის, რომ ჩამოყალიბდეს, როგორც სასიცოცხლოდ მნიშვნელოვანი კომერციული კერა, რომელიც აკავშირებს ევროპისა და აზიის ბაზრებს. ჩვენ, ასევე, ვზრუნავთ იმისათვის, რომ საქართველო კიდევ უფრო მიმზიდველი ადგილი გახდეს უცხოური ინვესტიციებისათვის. მეორეც, ჩვენ უზრუნველვყოფთ სოციალურ კეთილდღეობას ჩვენი ხალხისათვის, განათლებასა და ჯანდაცვაში მეტი ინვესტიციებით. განათლება ჩვენი ბავშვებისთვის ნათელი მომავლის გარანტიაა და ყველა იმსახურებს ჯანსაღ ცხოვრებას. და ბოლოს, ჩვენ მზად ვართ, დავიცვათ ჩვენი ქვეყნის წმინდა სუვერენიტეტი. ჩვენ უნდა დავამყაროთ ხანგრძლივი მშვიდობა, რომელიც დაეყრდნობა სიძლიერეს და პრაქტიკულ ურთიერთობას ჩვენს მეზობელ ქვეყნებთან, განსაკუთრებით კი, რუსეთთან", - განაცხადა ირაკლი ღარიბაშვილმა.
კონფერენციაში - "ევროპის ახალი გეოპოლიტიკური ლანდშაფტი: უსაფრთხოება, ეკონომიკური შესაძლებლობები, თავისუფლება და ადამიანური ღირსება ფრონტისპირა ქვეყნებში", მონაწილეობენ საქართველოს პრეზიდენტი გიორგი მარგველაშვილი, უშიშროების საბჭოს მდივანი ირინე იმერლიშვილი, უცხოელი ექსპერტები.
