საქართველოს პრემიერ-მინისტრი ირაკლი ღარიბაშვილის განცხადებით, მთავრობის მხრიდან მედიაზე არავითარი ზეწოლა არ ხდება და ამას დაფასება უნდა. როგორც მან ,,იმედსა” და ,,საზოგადოებრივ მაუწყებელზე” პოლიტიკური თოქ-შოუების დახურვასთან დაკავშირებით ჟურნალისტებთან განაცხადა, ტელევიზიების ხელმძღვანელების მხრიდან, ასეთ საკითხებზე მეტი გამჭვირვალობა და სიცხადეა საჭირო.
,,მესამე წელია, ჩვენმა ქვეყანამ და მთავრობამ დაამტკიცა, რომ მედიის თავისუფლების კუთხით ვართ პირველ ადგილზე. რაც არ უნდა ილაპარაკოთ, თქვენ და ოპონენტებმა, ეს მხოლოდ საუბარია. შედეგი არის ის, რომ მედია არის თავისუფალი. თუნდაც ის, რომ ნებისმიერ კრიტიკულ კითხვას გვისვამთ მთავრობის წარმომადგენლებს და არავითარი ზეწოლა ამ სამი წლის განმავლობაში არ ყოფილა მთავრობის მხრიდან, ეს არის აღიარება, ეს არის ფაქტი, ამას სჭირდება შეფასება და შესაბამისი დაფასებაც. თუ დაიხურა რომელიმე თოქ-შოუ, ეს არის კონკრეტული ტელევიზიის ხელმძღვანელის გადაწყვეტილება და მე არ ვაპირებ ამაზე კომენტარს. საჭიროა უფრო მეტი სიცხადე, გამჭვირვალობა და დასაბუთება, ეს უნდა მოკითხოთ ტელევიზიის ხელმძღვანელობას”, - განაცხადა პრემიერმა.
