ცნობილი ხდება თანხის რაოდენობა, რომელსაც მოსკოვი პარიზისგან ჩაშლილი კონტრაქტის გამო კომპენსაციის სახით მიიღებს. სააგენტო ტასის ინფორმაციით, რუსეთს საფრანგეთი 949 მილიონ 755 ათას ევროს გადაუხდის. შესაბამის შეთანხმებას ხელი რუსეთის ვიცე-პრემიერმა დიმიტრი როგოზინმა და საფრანგეთის თავდაცვისა და უშიშროების საბჭოს მდივანმა ლუი გოტიემ უკვე მოაწერეს. ხელშეკრულების თანახმად, საფრანგეთი რუსეთისთვის განკუთვნილ სამხედრო გემებს მანამდე ვერ გაყიდის, სანამ მოსკოვი კომპენსაციას სრულად არ მიიღებს. მისტრალის ტიპის 2 ვეტმფრენმზიდი საფრანგეთს რუსეთისთვის ჯერ კიდევ გასული წლის ნოემბერში უნდა გადაეცა, თუმცა კონტრაქტი რუსეთის მიერ ყირიმის ანექსიისა და დონბასის ოკუპაციის გამო ჩაიშალა.
