,,გპირდებით, რომ ძალისხმევას არ დავიშურებ საერთაშორისო არენაზე საქართველოს სახელმწიფო ინტერესების დასაცავად”, _განაცხადა საგარეო უწყების ხელმძღვანელმა გიორგი კვირიკაშვილმა ,,ამბასადორიალზე” სიტყვით გამოსვლისას.
მისივე თქმით, საქართველოს საგარეო პოლიტიკური პრიორიტეტები, უცვლელია.
,,საქართველოს საგარეო პოლიტიკური პრიორიტეტები, ცხადია, უცვლელი რჩება. ვინაიდან ისინი განსაზღვრულია, არა რომელიმე მთავრობის, არამედ საქართველოს მოსახლეობის თავისუფალი ნებით.საგარეო უწყება ყოველთვის წარმატებით ართმევდა თავს ამ ამოცანებს. მოხარული ვარ, რომ ვაგრძელებ ამ ტრადიციას, რასაც საქართველოს ევროპულ ოჯახში დაბრუნება და საერთაშორისო ასპარეზზე საკუთარი ადგილის განმტკიცება ჰქვია”, _განაცახდა კვირიკაშვილმა.
მინისტრის განმარტებით, უმთავრესი ყურადღება დაეთმობა ქვეყნის სუვერენიტეტისა და ტერიტორიული მთლიანობის დაცვას.
,,ჩვენს საქმიანობაში უმთავრესი ყურადღება დაეთმობა ქვეყნის სუვერენიტეტისა და ტერიტორიული მთლიანობის დაცვას. ძალისხმევა მიმართული იქნება ჩვენი პარტნიორებისა და საერთაშორისო ორგანიზაციების მხარდაჭერის გაზრდაზე, რათა ერთად აღვუდგეთ წინ საქართველოს სახელმწიფოებრიობისა და სუვერენიტეტის წინააღმდეგ მიმართულ უკანონო ქმედებებს. გავაკეთებთ ყველაფერს, რათა საერთაშორისო თანამეგობრობის ყურადღების ცენტრში მუდმივად იყოს საქართველოს ტერიტორიაზე მიმდინარე მცოცავი ანექსიისა და სამხედრო მილიტარიზაციის პროცესი. გავაგრძელებთ ოკუპირებული რეგიონების არაღიარების პოლიტიკას. გავააქტიურებთ დიპლომატიური ურთიერთობების დამყარების პროცესს შორეულ ქვეყნებთან, რათა მსოფლიოს ყველა კუთხეში მივიტანოთ ინფორმაცია საქართველოში მიმდინარე პროცესების შესახებ. ძალისხმევა მიმართული იქნება, რათა კიდევ უფრო გავზარდოთ საერთაშორისო ჩართულობა მთავრობის მიერ ინიცირებულ ნდობის აღდგენის პროცესებში”, _აღნიშნა კვირიკაშვილმა.
