კიევში გუშინ მომხდარი შეტაკების შედეგად,უკვე მესამე დასავებული გარდაიცვალა. ეროვნული გვარდიის კიდევ ერთი წევრის გარდაცვალების შესახებ დეპუტატი ოლგა ბოგომოლეცი "ფეისბუქის" საკუთარ გვერდზე წერს. მისი ინფორმაციით, დაღუპული ხერსონის რეგიონიდანაა. ის 1995 წელს დაბადებულია. მას ჭრილობები თავის არეში ჰქონდა მიყენებული.
რამდენიმე საათის წინ შინაგან საქმეთა მინისტრმა, არსენ ავაკოვმა გაავრცელა ინფორმაცია მეორე მსხვერპლის შესახებ. კიდევ ერთი სამხედრო - 24 წლის იგორ დებრინი კი გუშინ გარდაიცვალა.
უკრაინის შინაგან საქმეთა სამინისტროს პრესსპიკერი, არტიომ შევჩენკო კი რამდენიმე საათის წინ "ფეისბუქის" საკუთარ გვერდზე წერს, რომ დაშავებულია 141 ადამიანი.
"შინაგან საქმეთა სამინისტროს მონაცემებით, სულ დაშავებულია 141 ადამიანი, 131 პოლიციელი და ეროვნული გვარდიის წევრია, 10 მათგანის მდგომარეობა კრიტიკულია, დავაკავეთ 18 აქტივისტი, 13 კი გათავისუფლებულია", - წერს უკრაინის შსს-ის პრესსპიკერი.
უკრაინული მედიის ცნობით, დაპირისპირების დროს ერთ-ერთი სამართალდამცველი გარდაიცვალა. კიევში შეტაკება გუშინ მოხდა. დემონსტრანტებმა რადას შენობაში შეჭრა სცადეს, სადაც დეპუტატები დეცენტრალიზაციის შესახებ კანონპროექტზე მსჯელობდნენ. საკონსტიტუციო ცვლილება, რომელიც ქვეყნის ყველა რეგიონის ადგილობრივი თვითთმართველობების, მათ შორის დონეცკისა და ლუგანსკის ოლქების უფლებასმოსილების გაზრდას გულისხმობს, რადამ დაამტკიცა.
აქციის მონაწილეეები მთავრობას დონბასში სეპარატისტებისთვის ლეგიტიმაციის მიცემაში ადანაშაულებენ.
უკრაინის პრეზიდენტმა პეტრო პოროშენკომ გუშინ გამართულ აქციას ანტიუკრაინული უწოდა. მისივე თქმით, რადასთან განვითარებული მოვლენები ქვეყნისთვის "ზურგში ჩარტყმაა".
