ნიუ-იორკში, გაეროს შტაბ-ბინაში, საპარლამენტთაშორისო კავშირის (IPU) მიერ ორგანიზებული პარლამენტის სპიკერების მე-4 მსოფლიო კონფერენციამ მუშაობა დაიწყო. ფორუმის დაწყებასთან დაკავშირებით პარლამენტის თავმჯდომარემ, დავით უსუფაშვილმა მედიასთან კომენტარი გააკეთა.
,,დღეს დაიწყო მუშაობა პარლამენტის სპიკერების მსოფლიო კონგრესმა. ეს არის მე - 4 კონგრესი. წინა კონგრესი ჩატარდა 2010 წელს და ეს კონგრესი ტარდება გაეროს 70 წლის იუბილეს დღეებში, ასე, რომ არის მნიშვნელოვანი ღონისძიება. დღეს აქ, ნიუ-იორკში თავი მოიყარა მსოფლიოს ყველა ქვეყნის პარლამენტის სპიკერებმა, ერთადერთი რუსეთის პარლამეტის სპიკერი ვერ ჩამოვიდა, იმიტომ, რომ რუსეთის და შეერთებული შტატების დღევანდელი მდგომარეობის გამო მას შეერთებულმა შტატებმა სათანადო ვიზა არ მისცა, დანარჩენი მთელი მსოფლიო აქ არის. რა თქმა უნდა, ჩვენ გამოვიყენებთ ამ შესაძლებლობას იმისთვის, რომ გვქონდეს ორმხრივი შეხვედრები სხვადასხვა ქვეყნების პარლამენტების თავმჯდომარეებთან, განსაკუთრებით იმ ქვეყნებთან, რომელთანც ჩვენ გვაქვს გაზრდილი ინტერესი, ვისგანაც ჩვენ გვინდა მხარდაჭერა გაეროს ეგიდით იმ რეზოლუციისთვის, რომელიც ცნობილია როგორც დევნილების დაბრუნების რეზოლუცია, მაგრამ სინამდვილეში ეს ნიშნავს ქვეყნის ტერიტორიული მთლიანობის თოაბაზე მსოფლიო საზოგადოების მხარდაჭერის უზრუნველყოფას. იცით, რომ ამ თვალსაზრისით ჩვენ გვაქვს პროგრესი, გასულ კენჭისყრაზე მეტმა ქვეყანამ დაუჭირა მხარი და გვქნება შეხვედრები იმ ქვეყნებთანაც, ვისთანაც მეტი მუშაობაა საჭირო, აგრეთვე იმ პარლამენტებთან, იმ ქვეყნებთან, ვისთანაც ჩვენ გვინდა კიდევ უფრო ღრმა კონტაქტები ვიზალიბერალიზაციის პროცესის წარმატებით დასასრულებლად, ნატოში ინტეგრაციის პროცესში მხარდაჭერისთვის, ამიტომ გვექნება შეხვედრები ნატოს წამყვანი ქვეყნების პარლამენტების წარმომადგენლებთან, ვისთანაც კიდევ უნდა გაგრძელდეს მუშაობა. მე მექნება საშუალება სიტყვით მივმართო კონგრესის მონაწილეებს. ეს კონფერენცია ეძღვნება გლობალურ პრობლემებს, ამიტომ ჩვენ გვექნება საუბარი ისეთ თემებზე, როგორიც არის მსოფლიო მშვიდობა, სტაბილურობა, ადამიანის უფლებების დაცვა და რაც ყველაზე მთავარია, საერთაშორისო წესრიგის და საერთაშორისო სამართლის პრინციპების დაცვის უზრუნველყოფა. ამ თვალსაზრისით, მოგეხსენებათ, გაერო არის წამყვანი საერთაშორისო დაწესებულება და პარლამენტების წარმომადგენლები შევეცდებით ჩვენი ხმა მივაწვდინოთ მთელ მსოფლიოს, ვინაიდან, დღეს აქ თავი მოიყარა მსოფლიოს ყველა ქვეყნის ხალხების არჩეულმა პოლიტიკოსებმა და ჩვენ ამას გამოვიყენებთ, ბოლოში მივიღებთ დეკლარაციას ამ ყველაფერზე“,-განაცხადა დავით უსუფაშვილმა.
