რუსეთის საგარეო საქმეთა სამინისტროს წარმომადგენელმა მარია ზახაროვამ განაცხადა, რომ დასავლეთის ქვეყნებსა და თბილისს შორის კავშირების გაღრმავება რეგიონში უსაფრთხოების მხრივ არსებული ვითარების დაძაბვას გამოიწვევს. რუსული მედიის ინფორმაციით, ლავროვის უწყებაში ნატო-საქართვფელოს ერთობლივი ცენტრის გახსნას ალიანსის პროვოკაციული პოლიტიკის გაგრძელებას უწოდებენ.
"ჩვენი აზრით, ეს ნაბიჯი ალიანსის პროვოკაციული პოლიტიკის გაგრძელებაა, რომელიც მიზნად ისახავს მისი გეოპოლიტიკური გავლენის გაფართოებას, რისთვისაც იგი ხშირად იყენებს თავისი პარტნიორი ქვეყნების რესურსებს", - განაცხადა ზახაროვამ. მისივე თქმით, რუსეთი თავის მოვალეობას შეასრულებს და უზრუნველყოფს თავისი მოკავშირეების უსაფრთხოებას.
ეროვნულ სასწავლო ცენტრ კრწანისის ტერიტორიაზე, NATO-საქართველოს ერთობლივი წვრთნისა და შეფასების ცენტრი 27 აგვისტოს გაიხსნა.
ცენტრი ოფიციალურად NATO-ს გენერალურმა მდივანმა იენს სტოლტენბერგმა და საქართველოს პრემიერმინისტრმა ირაკლი ღარიბაშვილმა გახსნეს. ცერემონიალის ფარგლებში იენს სტოლტენბერგი საქართველოს შეიარაღებული ძალების იმ ასეულს შეხვდა, რომელიც NATO-ს სწრაფი რეაგირების ძალებისთვის გადამზადდა.
წვრთნისა და შეფასების ცენტრის დაარსება უელსის სამიტზე მიღებული NATO-საქართველოს არსებით ღონისძიებათა პაკეტის ფარგლებში იყო გათვალისწინებული.
