დღეს, 27 აგვისტოს, 14:10 საათზე ნატოს გენერალური მდივანი დღეს კრწანისის სასწავლო ცენტრის ტერიტორიაზე ნატო-საქართველოს ერთობლივი წვრთნისა და შეფასების ცენტრის გახსნის ცერემონიას დაესწრება.
იენს სტოლტენბერგი ცერემონიას საქართველოს პრეზიდენტთან, პრემიერთან და მთავრობის სხვა წევრებთან ერთად დაესწრება.
სტოლტენბერგი ასევე საქართველოს შეიარაღებული ძალების ასეულს შეხვდება, რომელიც ნატოს სწრაფი რეაგირების ძალებისთვის გადამზადდა.
საქართველოს შეიარაღებული ძალების გაერთიანებული შტაბის უფროსის შეფასებით, ეს ცენტრი ნატო-საქართველოს თანამშრომლობას კიდევ უფრო გააქტიურებს.
დღესვე, 27 აგვისტოს, 10:25 საათზე, გმირთა მოედანზე, ალიანსის გენერალური მდივანი იენს სტოლტენბერგი და საქართველოს შეიარაღებული ძალების გენერალური შტაბის უფროსი, გენერალ-მაიორი ვახტანგ კაპანაძე პატივს მიაგებენ საქართველოს ტერიტორიული მთლიანობისთვის დაღუპულ გმირთა ხსოვნას და გვირგვინით შეამკობენ დაღუპულ გმირთა მემორიალს.
10:45 საათზე, საქართველოს თავდაცვის სამინისტროში, ნატოს გენერალური მდივანი იენს სტოლტენბერგი საქართველოს თავდაცვის მინისტრს თინათინ ხიდაშელს შეხვდება.
11.30 საათზე, მთავრობის ადმინისტრაციაში ნატოს გენერალური მდივანი იენს სტოლტენბერგი საქართველოს პრემიერ-მინისტრსირაკლი ღარინაშვილს შეხვდება, რომლის დასრულების შემდეგ მხარეები მედიისთვის ერთობლივ განცხადებებს გააკეთებენ.
გუშინ, 26 აგვისტოს, ნატოს გენმდივანი საქართველოს პრეზიდენტს გიორგი მარგველაშვილს შეხვდა.
არაოფიციალური ვახშმის დაწყების წინ საქართველოს პრეზიდენტმა ნატო-ს გენერალურ მდივანს ავღანეთში ნატო-ს ორი ჯარისკაცის დაღუპვის გამო მიუსამძიმრა.
შეხვედრისას მხარეებმა საქართველოს ჩრდილოატლანტიკურ ალიანსში გაწევრიანების პროცესში მიღწეული პროგრესი შეაფასეს.
საქართველოს პრეზიდენტმა ნატო-ს დელეგაციასთან რეგიონული უსაფრთხოების საკითხები და ავღანეთში, ნატო-ს მისიაში ქართული სამხედროების მონაწილეობის მნიშვნელობა განიხილეს.
მხარეებმა საქართველოს ოკუპირებული ტერიტორიების „ბორდერიზაციის“ პროცესზე და ქვეყანაში მიმდინარე დემოკრატიულ რეფორმებზეც ისაუბრეს.
საქართველოს პრეზიდენტი იენს სტოლტენბერგთან ერთად, კრწანისის სასწავლო ცენტრის ტერიტორიაზე ნატო-საქართველოს ერთობლივი წვრთნისა და შეფასების ცენტრის გახსნას დაესწრება.
საქართველოს პრეზიდენტი და ნატო-ს გენერალური მდივანი ვიზიტის ფარგლებში ოფიციალურ შეხვედრასაც გამართავენ, რის შემდეგაც პრეზიდენტის სასახლეში, მედიისთვის ერთობლივი განცხადებები გაკეთდება.
