რუსეთის ფედერაციის საგარეო საქმეთა მინისტრის, სერგეი ლავროვის განცხადებით, თუ იქნება შეთავაზება ამერიკელი პარტნიორების მიერ გაყინული დიალოგის არხების აღდგენაზე, რუსეთი კეკლუცობას არ დაიწყებს და დათანხმდება. "ბიბისის" ინფორმაციით, მოსკოვი მზადაა ვაშინგტონთან ურთიერთობის გაუმჯობესებისთვის.
"ჩვენ არავისთვის თხოვნას არ ვაპირებთ, მაგრამ თუ სისტემატურად გვექნება შემოთავაზება იმის თაობაზე, რომ აღდგეს დიალოგის ის არხები, რომელიც ჩვენი ამერიკელი პარტნიორების მიერ გაიყინა, ჩვენ კეკლუცობას არ დავიწყებთ და დავთანხმდებით ამ არხების აღდგენას", - განაცხადა ლავროვმა და დასძინა, რომ ამ კუთხით მოსკოვი ჯერ ძალიან მკაფიო სიგნალებს ვერ იღებს ვაშინგტონისგან.
რუსეთსა და დასავლეთის ქვეყნებს, მათ შორის აშშ-ის შორის ურთიერთობები, რუსეთის მიერ ყირიმის ანექსიისა და აღმოსავლეთ უკრაინაში კონფლიქტის დაწყების შემდეგ დაიძაბა.
შეგახსენებთ, რუსეთის პრეზიდენტი ვლადიმერ პუტინი ამერიკის შეერთებულ შტატებში ჩასვლას და გაეროს გენერალური ასამბლეის 70-ე სესიაზე დასწრებას გეგმავს.
