ზალდასტანიშვილის ქუჩაზე ხეების უნებართვო მოჭრის ფაქტზე მასალები შინაგან საქმეთა სამინისტროში გუშინ საღამოს გადაიგზავნა, - ამის შესახებ  
მერიის ეკოლოგიისა და გამწვანების საქალაქო სამსახურის ხელმძღვანელმა ბიძინა გიორგობიანმა საკრებულოში გარემოს დაცვის კომისიის სხდომაზე განაცხადა. მისი თქმით, გარემოზე მიყენებული ზარალი 19 ათას ლარს შეადგენს. 
"შინაგან საქმეთა სამინისტროში გადაიგზავნა გუშინ საღამოს მასალები. გარემოზე მიყენებული ზიანი შეადგენს 12 ათას ლარს. თუმცა, იქედან გამომდინარე, რომ ისტორიულ უბანში მოჭრილი ხე თითქმის ორმაგად იანგარიშება, ზარალი 19 ათასი ლარი გახდა. სისხლის სამართლის პასუხისმგებლობის საკითხი დადგება იმ მესაკუთრის მიმართ, ვინც გააკეთა მსგავსი რამ. როგორც ვიცი, ქორიძეა გვარად", - განაცხადა ბიძინა გიორგობიანმა.
მისი განცხადებით, მოჭრის ნებართვა გაცემული იყო 4 გამხმარ ფიჭვზე და 5 ავარიულ ფიჭვზე. გიორგობიანის თქმით, მოჭრილია 5 ავარიული ფიჭვი, 4 გამხმარი ფიჭვი კვლავ მოუჭრელია და მიმდებარედ 16 ჯანსაღი ფიჭვი უნებართვოდ არის მოჭრილი.