იური ვაზაგაშვილის მკვლელობაში ბრალდებული გია სოსანაშვილის ადვოკატი იმ პირებს ასახელებს, ვისთანაც მისი დაცვის ქვეშ მყოფს საფრანგეთში სატელეფონო კონტაქტი ჰქონდა.
სოსო ჯოგლიძემ ჟურნალისტებს საქალაქო სასამართლოში ვაზაგაშვილის საქმეზე სასამართლო სხდომის გადადების შემდეგ განუცხადა, რომ ბრალდებული ადვოკატთან საუბრისას გამოეხმაურა პროკურატურის ინფორმაციას, რომლის მიხედვითაც, სატელეფონო საუბრების საფუძველზე საფრანგეთსა და ამერიკაში მიმდინარეობს ძიება იმ პირთა მიმართ, რომელსაც ბრალდებული ესაუბრა იური ვაზაგაშვილის აფეთქების წინა პერიოდში. ადვოკატის თქმით, საუბარია სოსანაშვილის მეგობრებზე - ზაზა სიმონიშვილსა და გივი სილაგაძეზე.
ჟურნალისტების შეკითხვაზე, შესაძლებელია თუ არა ეს პირები ვაზაგაშვილის მკვლელობის პერიოდში საქართველოში ყოფილიყვნენ და შემდეგ კვლავ დაბრუნებულიყვნენ საფრანგეთში, სოსანაშვილმა აღნიშნა, რომ ეს პროკურატურამ უნდა გაარკვიოს.
იური ვაზაგაშვილის მკვლელობის თანამონაწილეობაში ბრალდებულს აშშ-სა და საფრანგეთში ეძებენ. როგორც საქმის პროკურორმკა ლაშა ცქვიტარიამ განაცხადა, საუბარია პირზე, რომლის დნმ-იც სოსანაშვილის დნმ-ის კვალთან ერთად ასაფეთებელ მოწყობილობაზე აღმოაჩინეს. მისივე განცხადებით, პროკურტურამ შეერთებულ შტატებსა და საფრანგეთს უკვე მიმართა.
