რუსეთის საგარეო საქმეთა მინისტრმა ირანელ კოლეგასთან შეხვედრაზე, დონბასში ვითარების გაუარესებაზე ისაუბრა. სერგეი ლავროვის შეფასებით, საბრძოლო მოქმედებები იმდენად გააქტიურდა, რომ „ახლა უკვე შეიძლება ვისაუბროთ არა გამყოფ ხაზზე, არამედ ფრონტზე“. მისი თქმით, უკრაინული ძალები დაპირისპირების ხაზიდან სამხედროების და შეიარაღების გაყვანის ნაცვლად, პოზიციებს აძლიერებენ.
კიევში კი აცხადებენ, რომ დასახლებების მიმართულებით პრორუსი მებრძოლები ისროდნენ, რის შედეგად, გასული 24 საათის განმავლობაში 2 უკრაინელი სამხედრო დაკარგეს.
მარიუპოლში, დაბომბვის შედეგად, ბოლო მონაცემით, სამი ადგილობრივი დაიღუპა, 6 კი დაიჭრა. დანგრეულია 50-ზე მეტი საცხოვრებელი სახლი. ვითარება კვლავ დაძაბულია გორლოვკასა და დონეცკშიც, სადაც ასევე იერიშები განხორციელდა.
პარალელურად, რუსეთის პრეზიდენტი დღეს ყირიმში ჩავიდა. ვლადიმირ პუტინი მონაწილეობას მიიღებს ყირიმის რუსეთთან შემაერთებელი ხიდის მშენებლობის დაწყების ცერემონიაში, ასევე გამართავს თათბირს რუსეთში ტურიზმის განვითარების შესახებ.
