"ქართულ ოცნება - დემოკრატიულ საქართველოს" რამდენიმე რეგიონულ ორგანიზაციაში ახალი თავმჯდომარე ეყოლება, - ამის შესახებ პარტიის პოლიტსაბჭოს სხდომის დასრულების შემდეგ ჟურნალისტებს მმართველი გუნდის წევრმა, ზვიად კვაჭანტირაძემ განუცხადა.
მისივე თქმით, რეგიონულ ორგანიზაციებში აღმასრულებელი მდივანი დაინიშნება, რომელიც ყოველდღიური სამუშაოს წარმმართველი ძირითადი ძალა იქნება.
"სექტემბერში დაგეგმილი რეგიონული კონფერენციების ძირითადი დანიშნულება იქნება ადგილობრივი ორგანიზაციების მუშაობის გააქტიურებისთვის სერიოზული იმპულსების მიცემა. მთელ რიგ ორგანიზაციებში დაინიშნება აღმასრულებელი მდივნები, რამდენიმე შემთხვევაში კი პარტიას ექნება რეკომენდაცია ადგილობრივი ორგანიზაციების ხელმძღვანელების გამოცვლის თაობაზე. ვფიქრობ, სექტემბერში, ოქტომბრის პირველ ნახევარში მთელი ქვეყნის მასშტაბით ჩავატარებთ ყველგან კონფერენციებს, რაც ძალიან დიდი სტიმული იქნება პარტიისთვისაც და ზოგადად როგორც პარტიული, ისე ქვეყნის პოლიტიკური ცხოვრებისთვის", - აღნიშნა კვაჭანტირაძემ.
