საპარლამენტო ფრაქცია "ქართული ოცნება" მესტიას ეწვია და ადგილობრივ მოსახლეობას პარლამენტის მიერ მიღებული მთის კანონი გააცნო. როგორც ,,ჯი-ეიჩ-ენს” ფრაქციიდან აცნობეს ღონისძიება ორგანიზებულია ,,ეროვნულ–დემოკრატიული ინსტიტუტის” (NDI) მიერ, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით.
მესტიას ფრაქციიდან სტუმრობენ: გია ვოლსკი, ირაკლი ტრიპოლსკი, გია ჟორჟოლიანი, დიმიტრი ხუნდაძე, კარლო კოპალიანი, მირიან წიკლაური და დარეჯან ჩხეტიანი.
"ჩვენი ფრაქცია აგრძელებს ადგილობრივი მოსახლეობის მოთხოვნით მაღალმთიან რეგიონებში გასვლას და მთის კანონის გაცნობას. დღეს ვიმყოფებით მესტიაში სადაც მოსახლეობასთან ვსაუბრობთ ყველა მნიშვნელოვან თემაზე. აქ იმყოფება ფინანსთა მინისტრი, ნოდარ ხადური, რომელიც საგადასახადო შეღავათებთან დაკავშირებით დეტალურად ესაუბრა ხალხს. მთის კანონში საქართველოს მაღალმთიანი რეგიონებისთვის სასიცოცხლოდ მნიშვნელოვანი საკითხებია შესული და ამას მოსახლეობა პოზიტიურად ხვდება”, _განაცახდა ფრაქცია "ქართული ოცნების" ხელმძღვანელმა გია ვოლსკიმ.
მესტიის მაჟრიტარი დეპუტატის ვიქტორ ჯაფარიძის თქმით, კი სვანეთი და მესტია ათეული წლებია აღნიშნულ კანონს ელოდებოდა.
"სვანეთი და მესტია ათეული წლებია ამ კანონს ელის. ეს არის მთის გადარჩენის ერთადერთი გზა. მნიშვნელოვანია ის რომ კანონი სრულად ამოქმედდება 2016 წელს. ხალხი დიდი სიხარული ხვდება ამ კანონს და სჯერათ რომ ყველაფერი სწორად განხორციელდება”, _განაცხადა ვიქტორ ჯაფარიძემ.
