ცენტრალური მთავრობა ”თავისუფალი ტურისტული ზონების შესახებ” კანონში ცვლილებებზე მუშაობს, რაც ტურისტულ ზონებზე ინვესტორის ინტერესს გაზრდის. როგორც აჭარის ფინანსთა და ეკონომიკის მინისტრი დავით ბალაძე აცხადებს, ახალი რეგულაციებით ინვესტორს პროექტის განხორციელების ვადა გაეზრდება.
”ამ ეტაპზე მიმდინარეობს მუშაობა ტურისტულ ზონასთან დაკავშირებულ ნორმატიულ აქტებში ცვლილებების შეტანის თაობაზე, რაც ვფიქრობ საინვესტიციოდ უფრო მიმზიდველს გახდის ტურისტულ ზონებს.
არსებული რეგულაციის ერთი-ერთი სირთულე მდგომარეობს იმაში, რომ ხელშეკრულებით გათვალისწინებული ვალდებულების შესასრულებლად ინვესტორს შეიძლება არაუმეტეს 3 თვიანი ვადა მიეცეს, რაც კომპანიისთვის საკმაოდ მცირე დროა.
ახალი ნორმატიული აქტის ამოქმედების შემდეგ კი დამატებითი ვადა უკვე 3 თვეზე მეტი დროით განისაზღვრება”,- აცხადებს დავით ბალაძე.
მინისტრის თქმით, ინვესტორს შეეძლება თავსებად საქმიანობად სამორინეს მოწყობა და მისი ფუნქციონირება განახორციელოს.
”რაც შეეხება ქობულეთის ტურისტული ზონის ტერიტორიაზე არსებულ ვითარებას, მინდა აღვნიშნო, რომ ქობულეთის მუნიციპალიტეტის მიერ წყლისა და სხვა სისტემების მოწესრიგების სამუშაოები უკვე დასრულებულია. ასევე აშენდება 2 სტადიონი, მისასვლელი ბილიკები და პარკინგი. ქობულეთის მუნიციპალიტეტის ბიუჯეტიდან აღნიშნული პროექტები 549 770 ლარით დაფინანსდება. უახლოეს პერიოდში მოქნილი და ეფექტური საკანონმდებლო რეგულაციის ამოქმედება ახალ ინვესტიციების მოზიდვას შეუწყობს ხელს, რაც ბუნებრივია სამომავლოდ ამ ტერიტორიის განვითარებას განაპირობებს”, აცხადებს დავით ბალაძე.
აჭარის მთავრობის მეთაური განმარტავს, რომ ინვესტორებს ამ დროისათვის ძირითადად ბათუმი და მიმდებარე ტერიტორია აინტერესებთ.
”ტურისტული ზონა გარკვეულ შეღავათებს მოიცავს. ამ დროისათვის ზონით 2 კომპანიაა დაინტერესებული - ერთმა სასტუმროს მშენებლობა დაასრულა, ხოლო მეორე მშენებლობის პროცესშია. ამ მიმართულებით მუშაობა გრძელდება, თუმცა ამ ეტაპისათვის ინტერესი ძირთადად ბათუმზე და მის მიმდებარე ტერიტორიაზე არსებობს”, აცხადებს არჩილ ხაბაძე.
ხაბაძე ამბობს, რომ იმისათვის, რომ ბულვარის დაგეგმარება უკეთ განხორციელდეს, ამისათვის ბულვარის განვითარების სტრატეგია დაიწერება.
”ეკონომიკის სამინისტროს გამოყოფილი აქვს 160 ათასი ლარი და უახლოეს პერიოდში დავუკვეთავთ და დავდებთ ბულვარის განვითარების 5 წლიან გეგმას, რომელიც სხვადასხვა რეგულაციებსაც ითვალისწინებს. ასევე იქნება გარკვეული ხარჯთაღრიცხვა, თუ რა უნდა გაკეთდეს ამ 5 წლის განმავლობაში”, აცხადებს არჩილ ხაბაძე.
ეკონომიკისა და მდგრადი განვითარების მინისტრის მოადგილემ ქეთი ბოჭორიშვილმა, 14 აპრილს, სააგენტო ”ჯი-ეიჩ-ენთან” საუბრისას განაცხადა, რომ თუ კი მარტივი მშენებლობისათვის, 18 თვე საკმარისი იყო, რთული ნაგებობების მშენებლობა 18 თვეში ვერ ესწრება და ცვლილებებიც ამ მიზეზით მოხდება. რაც შეეხება ”თავისუფალი ტურისტული ზონების შესახებ” კანონით განსაზღვრულ შეღავათებს, ის ინვესტორებისათვის უცვლელი დარჩება. ანუ სასტუმროს მშენებლობის დროულად დასრულების შემთხვევაში, მთავრობა ინვესტორს 15 წლით ქონებისა და მოგების გადასახადისგან გათავისუფლებს.
”დაგეგმილი ცვლილებები მოიცავს რამდენიმე პუნქტს. ერთ-ერთია არის სასტუმროს ტერმინის განმარტების დამატება. დღევანდელი სასტუმროს ტერმინის განმარტება მოიზარებს მხოლოდ ერთი სასტუმრო ნაგებობის მშენებლობას, რაც ზღუდავს კურორტის ტიპის მშენებლობის განვითარებას, რომელიც შეიძლება მოიცავდეს კოტეჯებს და სხვა. აქედან გამომდინარე ეს არის ტექნიკური ცვლილება, რომელიც სასტუმროს ტერმინის განმარტებას ითვალისწინებს და რომელიც მეტ შესაძლებლობას მისცემს ინვესტორს, რომ სხვადასხვა ტიპის პროექტები შექმნას და განახორციელოს.
როგორც ცნობილია თავისუფალი ტურისტული ზონების კონცეფცია თავდაპირველად მოიცავდა ქობულეთს, სადაც იყო გამზადებული პროექტები, ე.წ. 3 ვარსკვლავიანი, მარტივი შენობები. შემდგომ პროცესი განვითარდა და ანაკლიას და სხვა ტერიტორიებს მოედო. კანონით მშენებლობისათვის განსაზღვრული 18 თვე სწორედ ასეთი ტიპის, მარტივი, გამზადებული პროექტებისათვის და მშენებლობებისათვის იყო გათვალისწინებული . თუმცა როდესაც ანაკლიაში ინვესტორს დაევალა, რომ პროექტი შეიმუშაოს და ეს პროექტები შესაძლოა იყოს კოტეჯები, ან თუნდაც 5 ვარსკვლავიანი სასტუმრო რათქმაუნდა ასეთ პროექტებს უფრო მეტი დრო სჭირდება ვიდრე კანონით გაწერილი 18 თვე. გასათვალისწინებელია ასევე ამინიც. 18 თვე რეალურად ლოგიკურ ჭრილში აღარ ჯდება და ფაქტობრივად აპრიორში ვაგდებთ ინვესტორს. წარმოუდგენელია ამ ვადაში პროექტის შესრულება. ამ ყველაფრიდან გამომდინარე ვადა უნდა შეიცვალოს და კანონით არ უნდა იყოს გაწერილი, რომ მშენებლობა უნდა დასრულდეს 18 თვეში. ვადა, პროექტიდან გამომდინარე, სპეციალურმა კომისიამ უნდა განსაზღვროს. თუ მარტივი მშენებლობაა იყოს 18 თვე, მაგრამ თუ მრავალფუნქციური კომპლექსია და აღემატება 80 ნომერს და არის თუნდაც 150 ნომრიანი შესაძლებელი უნდა იყოს, რომ პროექტის განსახორციელებლად ლოგიკური ვადები დაწესდეს. მინდა გითხრათ, რომ ცვლილება არ შეზღუდავს ინვესტორს და უფრო საინტერესო პროექტებიც განხორციელდება”- განმარტავს ქეთი ბოჭორიშვილი.
მინისტრის მოადგილის ინფორმაციით, მთავრობას საკანონმდებლო ცვლილებების განსახირციელებლად საჭირო მაგალითებიც აქვს.
”ინდოელ ინვესტორს აინტერესებს ანაკლიაში კოტეჟების მშენებლობა და რომ ასეთი ტიპის მშენებლობებისათვის ვადები არ დაირღვეს, სწორედ ამიტომ ხდება ასეთი ცვლილებები”, - აცხადებს ბოჭორიშვილი.
როგორც ცნობილია, 2010 წელს ქობულეთში "თავისუფალი ტურისტული ზონის" განვითარების მიზნით, ე. წ. "ფიჭვნარის" ტერიტორიაზე, ზღვიდან 1400 მ-ის დაშორებით, ახალი სასტუმროების მშენებლობისთვის მთავრობამ პოტენციურ ინვესტორებს განსხვავებული შეღავათები შესთავაზა. პროექტის თანახმად, "ფიჭვნარის" ტერიტორიაზე, მიწის 3 ნაკვეთი გამოიყო (საერთო ფართით 11,3 ჰა), სადაც 30 სასტუმრო კორპუსის მშენებლობა იგეგმებოდა. მთავრობამ განსაზღვრა ასევე სასტუმრო კორპუსების 3 ტიპი და ინვესტორი საკუთარი სურვილის მიხედვით არჩევდა თუ რა ტიპის სასტუმროს ააშენებდა. იმავდროულად, ინვესტორს მიწის ნაკვეთი სიმბოლურ ფასად გადაეცემოდა.
თავის დროზე სამთავრობო კომისიამ 8 ინვესტორი გამოავლინა კიდეც. მათ ქობულეთში 15 სასტუმრო კომპლექსი უნდა აეშენებინათ, თუმც შემდგომ ინვესტორთა ნაწილი თამაშიდან გავიდა, რის გამოც მაშინდელმა მთავრობამ მარცხი ღიად აღიარა.
წინა მოწვევის პარლამენტის მიერ დამტკიცებული კანონის მიხევით, ინვესტორი, რომელიც ქობულეთის ტურისტულ ზონაში სულ მცირე 1 მილიონი ლარის ინვესტიციას ჩადების, ის მომდევნო 15 წლის მანძილზე მოგების და ქონების გადასახადისგან განთავისუფლდება. თავდაპირველი ინიციატივით, სასტუმროს მშენებლობა ინვესტორს 2011 წლის 1 აგვისტომდე უნდა დაესრულებინა და მხოლოდ ამ შემთხვევაში მიიღებდა ის საგადასახადო შეღავათებს. თუმცა, შემდეგ აღნიშნული შემოთავაზება შეიცვალა და გადაწყდა, რომ საბოლოო ვადებს თითოეული ინდივიდუალური შემთხვევისთვის სპეციალური სახელმწიფო კომისია განსაზღვრავს.
ქობულეთის ტურისტული ზონის განვითარებით ახალი ხელისუფლება თავიდანვე იყო დაინტერესებული, რადგანაც არც ქვეყნის ეკონომიკურ გუნდს და არც ადგილობრივ მთავრობას გადაჭრით არ განუცხადებია, რომ პროექტი აღარ განვითარდებოდა და რომ აჭარაში ტურისტული ზონის განვითარების პერსპექტივები დაკონსერვდებოდა.
როგორც 2012 წლის დეკემბერში ეკონომიკისა და მდგრადი განვითარების მინისტრმა გიორგი კვირიკაშვილმა განმარტა, აჭარაში რამდენიმე ტურისტული ზონის შექმნაა დაგეგმილი, რადგანაც აჭარას საკმაოდ დიდი პოტენციალი გააჩნია და რომ ხელისუფლება შეეცდება ამ პოტენციალის გამოყენებას. მინისტრის თქმით, ქობულეთის ტურისტულმა ზონამ არ გაამართლა, თუმც ეს ყველაფერი წინა ხელისუფლების ბრალი იყო.
„ბიზნესი ზონაში შემოსვლისგან თავს იკავებდა, რადგანაც არ ქონდა გარანტია, რომ მთავრობისგან მინიჭებული შეღავათების სანაცვლოდ, ხელისუფლება შემდგომ მათ სხვა პროექტში მონაწილეობასაც აღარ მოთხოვდა"- განაცხადა 2012 წლის დეკემბერში კვირიკაშვილმა.
2011 წელს, ეკონომიკისა და მდგრადი განვითარების მაშინდელმა მინისტრმა ვერა ქობალიამ "ჯი-ეიჩ-ენთან" საუბრისას განაცხადა, რომ ქობულეთის ტურისტული ზონა ანაკლიის ტურისტული ზონის მსგავსად წარმატებული არ არის.
"ქობულეთის ტურისტული ზონა არ არის ისეთი წარმატებული, როგორც ანაკლიის ტურისტული ზონა. ინვესტორების მხრიდან უფრო მეტი დაინტერესება ანაკლიის ტურისტული ზონის მიმართ იქნება გამოხატული. თუმცა ქობულეთშიც მიმდინარეობს მშენებლობები და სამუშაოების დასრულების შემდეგ ქობულეთის ტურისტულ ზონაში ძირითადად ქობულეთის მაცხოვრებლები დასაქმდებიან. ჩვენ არ ვაპირებთ ამ პროექტის გაჩერებას. აჭარის მთავრობა და საინვესტიციო სააგენტო მუშაობს იმაზე, რომ გაცილებით მეტი ინვესტორის შემოყვანა მოხდეს"- განუცხადა "ჯი-ეიჩ-ენს" ვერა ქობალიამ.
