პრეზიდენტის მრჩევლი ადამიანის უფლებათა დაცვის საკითხებში კახა კოჟორიძე აცხადებს, რომ პრეზიდენტი პატიმართა შეწყალების პროცესში, პოლიტიკური და პარტიული ნიშნით არასდროს მოქმედებს.
პრემიერ-მინისტრის ირაკლი ღარიბაშვილის მიერ გაკეთებული განცხადების შეფასებისას მან კოჯორიძემ აღნიშნა, რომ გიორგი მარგველაშვილი ნამდვილად ეროვნული პრეზიდენტია და მსგავსი საკითხების გადაწყვეტის დროს, პარტიული ნიშნით არ მოქმედებს.
„მინდა, ვთხოვო პოლიტიკური თანამდებობის მქონე პირებს, რომ მსგავსი განცხადებების გაკეთების დროს სიფრთხილით და მაღალი პასუხისმგებლობით იმქომედონ, რათა ამ ტიპის განცხადებებმა არ გააჩინონ აღქმა, რომ საქართველოში შესაძლებელია, მართლმსაჯულება პოლიტიკური ნიშნით ხორციელდებოდეს, ხოლო ამ აღქმამ შემდეგ ჩვენი ქვყენის სტრატეგიული ინტერესები არ დააზიანოს“, - განაცხადა კახა კოჟორიძემ.
პრემიერ-მინისტრი პრეზიდენტის მიერ „ნაციონალური მოძრაობის“ წევრის აკაკი ბობოხიძის ძმის შეწყალების გადაწყვეტილებას დღეს გამოეხმაურა.
„ჩვენ ვნახეთ, რომ ჩვენი პრეზიდენტი არის ჭეშმარიტად „ნაციონალური“ პრეზიდენტი. გუშინ მან შეიწყალა ერთ-ერთი მსჯავრდებული, ბატონი ბობოხიძე, რომელიც ჩვენმა პროკურატურამ დააკავა. მას მიესაჯა პატიმრობა, პრეზიდენტმა კი შეიწყალა. ძალიან კარგია, რომ ასეთი კეთილშობილი პრეზიდენტი გვყავს. იმედი მაქვს, რომ ის სააკაშვილს, ბაჩო ახალაიას, ვანო მერაბიშვილს და სხვა „კეთილ ადამიანებსაც“ შეიწყალებს“, - განაცხადა ირაკლი ღარიბაშვილმა.
