საქართველოს მთავარი პროკურატურის დელეგაცია მთავარი პროკურორის გიორგი ბადაშვილის ხემძღვანელობით ბელორუსიაში სამუშაო ვიზიტით იმყოფება.
ვიზიტის ფარგლებში საქართველოს მთავარმა პროკურორმა გიორგი ბადაშვილმა და ბელორუსის გენერალურმა პროკურორმა ალექსანდრე კონიუკმა ურთიერთგაგების მემორანდუმს მოაწერეს ხელი. მემორანდუმი, ადამიანის უფლებების დაცვასა და დანაშაულთან ბრძოლაში ორი ქვეყნის სამართალდამცავი ორგანოების ურთიერთთანამშრომლობის გაღრმავებას ითვალისწინებს.
„დღეს, გლობალიზაციის პირობებში, როდესაც დანაშაული ტრანსნაციონალურ ხასიათს იღებს, სრულყოფილი გამოძიების წარმოება მნიშვნელოვნად დამოკიდებულია საერთაშორისო თანამშრომლობის ეფექტურად განხორციელებაზე და ურთიერთგამოცდილების გაზიარებაზე. სწორედ ამიტომ საქართველოს პროკურატურის ერთ-ერთი პრიორიტეტია საზღვარგარეთის ქვეყნების კომპეტენტურ ორგანოებთან თანამშრომლობის გაღრმავება და პროფესიული ურთიერთობის გამყარება“ - განაცხადა გიორგი ბადაშვილმა.
საქართველო - ბელორუსიის პროკურატურებს შორის გაფორმებული მემორანდუმის ფარგლებში, მხარეები დანაშაულთან ბრძოლაში, მათ შორის ორგანიზებულ და მაღალი ტექნოლოგიების სფეროში, ერთმანეთს ინფორმაციებს და გამოცდილებას გაუზიარებენ.
მემორანდუმი ასევე ორი ქვეყნის პროკურატურის თანამშრომლებისთვის სამართალწარმოების სხვადასხვა აქტუალურ საკითხებზე სემინარების ჩატარებას და პროკურორების კვალიფიკაციის ამაღლებას ითვალისწინებს.
ბელორუსიაში საქართველოს მთავარი პროკურატურის დელეგაციის ვიზიტი სამი დღე გაგრძელდება.
