საპარლამენტო უმრავლესობის წევრი სოსო ჯაჭვლიანი EBRD-თან დაკავშირებით გაკეთებულ განცხადებაზე ახალ განმარტებას აკეთებს და აცხადებს, რომ ევროპის რეკონსტრუქციისა და განვითარების ბანკს მან კარგი რეკლამა გაუკეთა. დეპუტატი ამასთანავე აცხადებს, რომ ამისთვის იგი EBRD-გან დაჯილდოვებასაც კი მოელის.
„ქალბატონმა ეკამ, როცა „იბიარდი“ ტარდებოდა, ყველაზე კარგად იცოდა, რომ მე იქ მიწვეული არ ვიყავი, რადგან არც ფინასისტი ვარ და არც ბანკირი. მან ამ სიტყვებით დამცინა და შესაბამისი პასუხი მიიღო. რაც შეეხება იმას, რომ ვითომ აქ პოლიტიკურ განცხადებებზე იყო საუბარი, პოლიტიკური განცხადება არ გამიკეთებია“, - დასძინა ჯაჭვლიანმა.
ჯაჭვლიანმა გუშინ, პარლამენტის სხდომაზე, ოპოზიციონერი კოლეგა მისი ოჯახის დანგრევის მცდელობაში დაადანაშაულა.
„აი, მაგალითად, ქალბატონ ეკა ხერხეულიძეს ჩემი ოჯახის დანგრევის მცდელობა ჰქონდა. მან ბრძანა ამ რამდენიმე თვის წინ, პარლამენტის სესია იმიტომ ჩაიშალა, რომ კვორუმი არ შედგა, სოსო ჯაჭვლიანი „იბიარდზე“ იყოო. რატომ მაყენებთ შეურაცხყოფას ქალბატონო ეკა? მე „იბიარდზე“ ვერასოდეს ვიქნები, მე ერთგული მეუღლე ვარ. თქვენი გუნდი დადიოდა ამ „იბიარდზე“ 10 წლის განმავლობაში. ეს „იბიარდობა“ ეტყობა ქვეყანას. ამიტომ „ნაიბიარდები“ ქვეყნის გამოყვანა სტაგნაციიდან ძალიან ძნელია და ჩვენ ვეცდებით, იმპლემენტირება გავაკეთოთ საღი აზრების", - განაცხადა ჯაჭვლიანმა.
