დაზარალებულები ბუტა რობაქიძის საქმეზე მოსამართლის აცილებას გეგმავენ, - ამის შესახებ გარდაცვლილის დედამ ია მეტრეველმა ჟურნალისტებთან განაცხადა.
თბილისის საქალაქო სასამართლოში მოსამართლემ დაზარალებული მხარის რამდენიმე ახლობელი რეპლიკებისა და შეძახილების გამო, სხდომათა დარბაზიდან გააძევა.
ია მეტრეველის თქმით, ის დააყენებს მოსამართლე დავით მგელიაშვილის აცილების საკითხს, რადგან დღეს მოსამართლე იქცეოდა ძალინ ცუდად და არ აჩერებდა ბრალდების მხარეს.
,,დონაძეს თავხედობას საზღვარი არ აქვს, ასევე საზღვარი არ აქვს მიქაძის ადვოკატის ქცევას, რომელიც შეურაცხყოფას აყენებდა პროკურორს ყოველ წუთს, შეურაცხყოფას აყენებდა მოწმეს და ჭირისუფლებს, გაუბედურებულ ხალხს. ამ საქმეს ასე არ დავტოვებ, დავაყენებ მოსამართლის აცილების საკითხს, რომელიც არ აჩერებს არასდროს დამნაშავეების მხარეს, გვენეტაძემდე მივალ და ამ მოსამართლის ყოფნა-არყოფნის საკითხს დავაყენებ. ხელისუფლებას მინდა მივმართო, სააკაშვილის რეჟიმის დროს ეს კრიმინალები, რომლებმაც ამ მდგომარეობაში ჩაგვყარეს ათეულობით ოჯახი, გაგვანადგურეს, დღეს ამდენს ბედავენ, დამნაშავეები ბოლოსდაბოლოს უნდა დაისაჯონ“, - განაცხადა მეტრეველმა.
პროკურორ დავით ნეფარიძის განმარტებით, მოსამართლის აცილების საკითხი შეუძლია დააყენონ მხარეებმა, თუმცა, მისი შეფასებით, მოსამართლის აცილების საფუძველი დღეისათვის არ არსებობს.
მთავარი პროკურატურა ბუტა რობაქიძის საქმესთან დაკავშირებით, გურამ დონაძეს და შსს–ს ხუთ ყოფილ მაღალჩინოსანს სამსახურებრივი უფლებამოსილების ბოროტად გამოყენებას ედავება, დაზარალებულის პირადი ღირსების შელახვით. დონაძესთან ერთად, საქმეში ბრალდებულები არიან - ზურაბ მიქაძე, დავით იაშვილი, ირაკლი ფირცხალავა, ალექსანდრე გვაზავა და ზაზა ბაქრაძე.
თბილისის საქალაქო სასამართლომ 25 000 ლარის გირაოს სანაცვლოდ გაათავისუფლა.
