საქართველოს თავდაცვის მინისტრი აცხადებს, რომ რუსეთის პროვოკაციებზე საქართველოს ძალიან პრაგმატული, ევროპული პასუხი აქვს.
მისი თქმით. დონალდ ტუსკმა დღის განმავლობაში რამდენჯერმე თქვა, რომ საოკუპაციო ხაზთან მიმდინარე მოვლენებზე მთავრობის რეაქციას მაღალ შეფასებას აძლევს.
„მთავარი მადლობა, რაც ჩვენ მათგან გვესმის ამ პროვოკაციებზე, ისაა, რომ ემოციებს არ ვყვებით და ძალიან პრაგმატული, ევროპული პასუხი გვაქვს ამ ტიპის მოქმედებებზე. ტუსკმა გამოიყენა ფრაზა - მთავარია არ გადააჭარბოთ რეაქციაშიო. ვფიქრობ, რომ ეს იყო ერთ-ერთი მთავარი გზავნილი მისი მხრიდან, პასუხი იმ პროვოკაციებზე, რომლის წინაშეც ქვეყანა დგას“, - განაცხადა თინათინ ხიდაშელმა პრეზიდენტის ადმინისტრაციაში, სადაც ევროკავშირის მისიის ეგიდით ცენტრალური აფრიკის რესპუბლიკაში საქართველოს სამშვიდობო კონტიგენტთან შეხვედრა გაიმართა.
