პარლამენტი მუშაობს ხურვალეთისა და წითელუბნის ტერიტორიაზე არსებულ ვითარებასთან დაკავშირებით და დოკუმენტი მომავალ კვირას იქნება მზად, - ამის შესახებ პარლამენტის ვიცე სპიკერმა მანანა კობახიძემ განაცხადა. მისი თქმით, არსებული სიტუაციიდან გამომდინარე, აუცილებელია ხელისუფლებამ ფრთხილად იმოქმედოს, რომ თავიდან იქნას აცილებული პროვოკაცია.
,,მომხდარ ფაქტთან დაკავშირებით მთავრობა და პარლამენტი ძალიან ინტენსიურად მუშაობს. გაცხადებულ იქნა, რომ ეს არის სამწუხაროდ ის პროვოკაცია, რომელიც ძალიან უნდა და აწყობს რუსეთის ხელისუფლებას, რაზეც არამც და არამც არ უნდა წამოვეგოთ და ძალიან ფრთხილად მივუდგეთ ასეთ საკითხებს. ყველაფერი უნდა გავაკეთოთ იმისთვის, რომ საერთაშორისო საზოგადოება, ბრიუსელი, ვაშინგტონი, ევროკავშირი, გაერო და ჩვენი მოკავშირე ქვეყნები აქტიურად იყვნენ ჩართული ამ საკითხზე რეაგირების თავლსაზრისით. პარლამენტი მუშაობს ამ თემაზე და მომავალ კვირაში აუცილებლად მომზადდება ის დოკუმენტი, რომელზეც ერთობლივად იმუშავებენ საგარეო საქმეთა კომიტეტი, ევროინტეგრაციის, თავდაცვის და უშიშროების კომიტეტი. ჩვენ მოვისმენთ ყველა ინფორმაციას შესაბამისი უწყებიდან და უნდა მივიღოთ შესაბამისი დოკუმენტი, რომელიც იქნება საქმიანი და არა რამე ურაპატრიოტიზმზე აგებული. სამწუხაროდ, ზედმეტი აგრესია, ზედმეტი აჟიოტაჟი, აწყობს ზოგიერთ პოლიტიკურ ძალას და ეს შესაძელებელია იყოს საფრთხის შემცველი. ჩვენ ვიცით 2008 წელი, ის აგრესია რომელსაც რუსეთი ძალიან კარგად განახორციელებს, ამიტომ გვინდა ძალიან ფრთხილი და პრაგმატული ნაბიჯების გადადგმა. ის, რომ რუსეთი არღვევს სისტემატურად საერთაშორისო ხელშეკრულებებს და არღვევს 2008 წლის 12 აგვისტოს ,,ცეცხლის შეწყვეტის შესახებ" შეთანხმებას, არაერთგზის გაცხადებულა. ჩვენი ზრუნვის და წუხილის საგანი ეს არის, რომ რუსეთმა თავი შეიკავოს ასეთი ქმედებებისგან", - განაცხადა მანანა კობახიძემ.
რაც შეეხება, შერიგებისა და სამოქალაქო თანასწორობის საკითხებში სახელმწიფო მინისტრს პაატა ზაქარეიშვილს მან განცხადა, რომ რუსი ოკუპანტების მიერ ე.წ. საზღვარი არ გადმოწეულა. როგორც მთავრობის სხდომის შემდეგ ზაქარეიშვილმა ჟურნალისტებთან განაცხადა, ყველაფერი კანონის ფარგლებში ხდება.
