მემარჯვენე სექტორის მებრძოლები იარაღის დაყრას მანამდე არ აპირებენ, სანამ კიევი მათ მოთხოვნებს არ შეასრულებს. ამის შესახებ შეიარაღებული დაჯგუფების ერთ-ერთმა ლიდერმა არტიომ სკოროპადსკიმ განაცხადა. მანამდე უკრაინის შინაგან საქმეთა სამინისტრომ და უშიშროების სამსახურმა მუკაჩევოში გამაგრებულ მებრძოლებს იარაღის დაყრისკენ მოუწოდა, რაზეც დაჯგუფების მეთაურმა დიმიტრი იაროშმა უარი თქვა და ხელისუფლებას მასშტაბური საპროტესტო აქციებით დაემუქრა. მემარჯვენე სექტორი შინაგან საქმეთა მინისტრისა და ზაკარპატიის ოლქის პოლიციის უფროსის გადაყენებას მოითხოვს. ვითარება ოლქში მას შემდეგ დაიძაბა, რაც დაჯგუფების მებრძოლებსა და სამართალდამცავებს შორის დაპირისპირება შეტაკებაში გადაიზარდა. ინციდენტისას 10 ადამიანი დაიჭრა. ვრცელდება ინფორმაცია მსხვერპლის შესახებაც.
