ყოფილი პრემიერ-მინისტრის ბიძინა ივანიშვილის ბიზნესცენტრთან აქცია გაიმართა, რომლის მთავარი ლოზუნგიც იყო - "ბიძინა წადი".
"ნაციონალური მოძრაობის" ახალგაზრდული ფრთისა და "თავისუფალი ზონის" წევრებმა განაცხადეს, რომ ბიძინა ივანიშვილის სურვილია საქართველო რუსეთს გადააბაროს. მათი განცხადებით, დღევანდელი მთავრობა უუნაროა და მალე უნდა წავიდეს.
,,ძალიან ახლოა საოკუპაციო ხაზი, ვადას ვაძლევთ და მოვუწოდებთ ბიძინა ივანიშვილს, გაიპაროს ამ საოკუპაციო ხაზის მეშვეობით, წინააღმდეგ შემთხვევაში, მას მოუწევს პასუხისგება", - განაცხადა აქციის ერთ-ერთმა ორგანიზატორმა გიორგი ონიანმა.
აქციის მონაწილეებს ხელთ ეჭირათ შემდეგი სახის ტრანსპარანტები: "საქართველოს ვერ შეიყვან ბუტკაში", "უუნარო მთავრობა". აქცია დაახლოებით 30 წუთს გაგრძელდა.
