ბრიუსელის სამიტი, რომელზეც დღეს საბერძნეთის ბედი უნდა გადაწყვეტილიყო, გადაიდო. ამის შესახებ ევროსაბჭოს პრეზიდენტმა დონალდ ტუსკმა განაცხადა. ევროკავშირის წევრი ქვეყნების ლიდერებს ათენის მიერ შეთავაზებული წინადადებათა პაკეტი უნდა განეხილათ, რის შემდეგაც ცნობილი გახდებოდა, უნდა ჰქონდეს თუ არა ათენს ევროკავშირისა და საერთაშორისო დონორთა დახმარების იმედი. მანამდე კი საბერძნეთის საკითხზე ევროჯგუფის წევრი ქვეყნების ფინანსთა მინისტრები მსჯელობენ. მოლაპარაკებათა პირველ რაუნდზე მათ კონკრეტულ შეთანხმებას ვერ მიაღწიეს. იმ შემთხვევაში, თუ ათენი საერთაშორისო კრედიტორთა დარწმუნებას ვერ შეძლებს, დეფოლტთან ერთად საბერძნეთს ევროზონის დატოვება მოუწევს. გერმანია საბერძნეთს ევროზონიდან 5 წლით გასვლას სთავაზობს, რაზეც ბერძნული მხარე უარს აცხადებს.
