პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე, რუსების მიერ სოფელ ორჭოსანთან საოკუპაციო ზოლის გადმოწევის ფაქტს აფასებს და აცხადებს, რომ რუსეთი ამისთვის მაღალ საფასურს იხდის.
აბაშიძე მიიჩნევს, რომ რუსეთის საოკუპაციო ძალების ქმედებების შესახებ საერთაშორისო საზგოადოებას ინფორმაცია დროულად უნდა მიეწოდოს.
"ამბობენ, რომ შეშფოთება არაფერია, მაგრამ ჩვენ უნდა მივაწოდოთ საერთაშორისო თანამეგობრობას არსებული მდგომარეობის შესახებ ინფორმაცია. რუსეთი ამ პოლიტიკის გამო მაღალ საფასურს იხდის,"- აცხადებს აბაშიძე, რომელიც ორჭოსანში იმყოფება და საოკუპაციო ზოლის მიმდებარე ადგილობრივ მოსახლეობასთან შეხვედრას გეგმავს.
შგახსენებთ, რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენლის ზურაბ აბაშიძისა და რუსეთის საგარეო საქმეთა მინისტრის მოადგილის გრიგორი კარასინის მორიგი შეხვედრა პრაღაში, 15 ივლისისთვის არის დაგეგმილი.
კარასინმა ივნისის ბოლოს განაცხადა, რომ ზურაბ აბაშიძესთან შესაძლოა აფხაზეთის რკინიგზის საკითხთან დაკავშირებითაც ისაუბროს. მისივე თქმით, აბაშიძესთან „აკრძალული თემები" არ არსებობს იმ საკითხებში, რაც ორმხრივ ურთიერთობებს შეეხება.
აღსანიშნავია, ასევე რომ აბაშიძე-კარასინის მორიგი შეხვედრა გაფართოებულ ფორმატშია დაგეგმილი, გარდა საგარეო საქმეთა სამინისტროსი, საქართველოს მხრიდან მასში ეკონომიკის სამინისტროს წარმომადგენელი, რუსეთიდან კი ტრანსპორტის სამინისტროს წარმომადგენლები მიიღებენ მონაწილეობას.
