ყოფილი პრემიერ-მინისტრის ზურაბ ჟვანიას გარდაცვალების საქმეზე ბრალდებულების - დაცვის ყოფილი წევრების მიხეილ ძაძამიასა და კობა ხარშილაძის საქმის არსებითი განხილვა, რომელიც საქალაქო სასამართლოში ნაფიცი მსაჯულების პირობებში მიმდინარეობს, დროებით დაიხურა.
დაცვის მხარე შუამდგომლობაში ზურაბ ჟვანიას პირადი ცხოვრების ინტიმურ დეტალებზე საუბარს აპირებს. ადვოკატებმა დააყენეს შუამდგომლობა, რომ საქმეს დაედოს FBI-ს მიერ გაცემული ექსპერტიზის დასკვნა, რომელიც ადვოკატ ბექა ბასილაიას განცხადებით, ზურაბ ჟვანიასა და რაულ უსუპოვის გარდაცვალების გარემოებებს უკავშირდება.
ბასიალაიას განცხადებით, ექსპერტიზის აღნიშნული დასკვნა მათ მოიპოვეს „რუსთავი2“-სგან. ტელეკომპანიამ კი, თავის მხრივ, ეს მასალები კონფიდენციალური წყაროსგან მიიღო. მისივე თქმით, ეს მასალები არის იმ მასალის ასლი, რაც მთავარ პროკურატურაში არის დაცული.
„თუ ბრალდების მხარე დაადასტურებს, რომ FBI-ს დედანი არის ჩვენი მასალის ასლი, მაშინ ამ შუამდგომლობას უკან წავიღებთ“, - განაცხადა ადვოკატმა.
ზურაბ ჟვანიას საქმეზე ყოფილი პრემიერის დაცვის სამსახურის უფროსს კობა ხარშილაძეს და მისი დაცვის წევრ მიხეილ ძაძამიას სამსხახურებრივ გულგრილობას ედავებიან.
