ევროპის ცენტრალური ბანკის პრეზიდენტი მარიო დრაგი აცხადებს, რომ რუსეთი ათენს გადარჩენაში ვერ დაეხმარება, - ამის შესახებ ინფორმაციას "როიტერი" ავრცელებს.
"არა მგონია, რომ ეს რეალური რისკია, მათ საკუთარი თავისთვის არ აქვთ ფული", - აღნიშნა ევროპის ცენტრალური ბანკის ხელმძღვანელმა.
რაც შეეხება გერმანიის კანცლერს ანგელა მერკელს, იგი კიდევ ერთხელ აკონკრეტებს, რომ საბერძნეთისთვის ვალის ჩამოწერა არ მოხდება.
"მე ვთქვი, რომ ვალის კლასიკურ ჩამოჭრას გამოვრიცხავ და ეს არ შეცვლილა გუშინდელი დღის შემდეგ", - ამის შესახებ "როიტერის" ცნობით, მერკელმა სარაევოში ვიზიტის დროს განაცხადა.
საბერძნეთმა ევროკავშირს ეკონომიკური რეფორმების ახალი პაკეტი დღეს უნდა წარუდგინოს, რადგანაც სამშაბათს გამართულ მოლაპარაკებებზე, დაპირების მიუხედავად, ქვეყნის პრემიერმინისტრი ალექსის ციპრასი კონკრეტული გეგმის გარეშე ჩავიდა. სავარაუდოდ, საბერძნეთი ევროკავშირისგან ფინანსური დახმარების ახალ პაკეტს მოითხოვს, რადგანაც ქვეყნის საბანკო სისტემა ჩამოშლის ზღვარზეა. საბერძნეთს ახალი ვალის მოთხოვნის საშუალებას საერთაშორისო სავალუტო ფონდის დასკვნა აძლევს, სადაც წერია, რომ ფინანსური ვითარებიდან გამომდინარე, ნაკლებად სავარაუდოა, ქვეყანამ სესხის გადახდა მისი რესტრუქტურიზაციის გარეშე შეძლოს.
"ჩვენ ვართ სრულად ჩართული, რათა ვიპოვოთ გამოსავალი არსებული ვითარებიდან, ჩვენი მისიის უმთავრესი ამოცანაა, რომ უზრუნველვყოთ ქვეყნის ფინანსური სტაბილურობა და ხელი შევუწყოთ იმას, რომ ქვეყანა სწრაფად გახდეს დავალიანებების გადახდისუნარიანი" -განაცხადა საერთაშორისო სავალუტო ფონდის პრეზიდენტმა კრისტინ ლაგარდმა.
საბერძნეთში დაბრუნებულმა ალექსის ციპრასმა ქვეყნის პრეზიდენტს ბრიუსელსა და სტრასბუგრში გამართული მოლაპარაკებების შესახებ გააცნო ინფორმაცია. ბანკების იძულებითი დასვენება ქვეყნის მთავრობამ ორშაბათამდე გაახანგრძლივა.
საბერძნეთმა 30 ივნისს სავალუტო ფონდის 1.6 მილიარდის მოცულობის ვალი არ გადაიხადა და ეს გადაწყვეტილება რეფერენდუმის შედეგებით გაამყარა.
