აშშ-ის სპეცსამსახურები მერკელს, გერჰარდ შროდერს, ჰელმუტ კოლსა და კიდევ 130-მდე სხვა მაღალჩინოსნის სატელეფონო საუბრებს უსმენდნენ, - ამის შესახებ ინფორმაციას WIKILEAKS-ის მიერ გამოქვეყნებული დოკუმენტების ახალ სერიაშია აღნიშნული.
2015 წლის ივნისში WIKILEAKS-ის გამოქვეყნებული ინფორმაციის თანახმად, ამერიკის ეროვნული უშიშროების სააგენტო საფრანგეთის სამი პრეზიდენტის - ჟაკ შირაკის, ნიკოლა სარკოზისა და ფრანსუა ოლანდის სატელეფონო საუბრებს უსმენდა. ოლანდმა განაცხადა, რომ საფრანგეთი ვერ მოითმენს ქმედებებს, რაც მის უსაფრთხოებას ემუქრება.
აღნიშნულთან დაკავშირებით გერმანიის მთავრობას ოფიციალური კომენტარი არ გაუკეთებია.
შეგახსენებთ, WIKILEAKS-ის დამფუძნებელი ჟულიან ასანჟი 2012 წლიდან შვედეთში ჩადენილი სექსუალური დანაშაულის ბრალდებით იძებნება. თავად ჟურნალისტი თავს უდანაშაულოდ მიიჩნევს და აცხადებს, რომ მის წინააღმდეგ აღძრული საქმე პოლიტიკურად მოტივირებულია. ასანჟი დიდ ბრიტანეთში ეკვადორის საელჩოში იმყოფება. ის პოლიციისთვის მიუწვდომელია, რადგან უცხო ქვეყნის საელჩოს ტერიტორიაზე იმყოფება.
