დნეპროპეტროვსკის გუბერნატორი ოდესელ კოლეგას დაუპირისპირდა. პრეზიდენტთან შეხვედრისას ვალენტინ რეზნიჩენკომ ღიად განაცხადა, რომ მას იგივე უფლებები და კარტ-ბლანში არ აქვს, როგორიც ოდესაში მიხეილ სააკაშვილს. „მინდა იცოდეთ, რომ ოდესის გარდა სხვა ოლქებშიც მუშაობენ. უბრალოდ, იგივე კრიტერიუმებით არ ვაზროვნებ, როგორითაც ბატონი სააკაშვილი, რომელიც გარკვეულ ქმედებებს კანონგარეშედ ახორციელებს. იგივენაირად რომ მოვიქცე, ამის უფლებას კანონი უნდა მაძლევდეს, რადგანაც წინააღმდეგ შემთხვევაში, ბატონი საყვარელიძე მომაკითხავს,“-განაცხადა რეზნიჩენკომ, რასაც სააკაშვილის რეპლიკა მოჰყვა. სააკაშვილმა პრაქტიკულად აღიარა, რომ გარკვეულ ქმედებებს კანონის გარეშე ახორციელებს, რადგანაც ჯერჯერობით კანონში ცვლილებები შესული არ არის, დნეპროპეტროვსკელმა გუბერნატორმა კი განაცხადა, რომ მას კანონის დარღვევა არ სურს. საბოლოოდ ვითარება პრეზიდენტმა პოროშენკომ განმუხტა. უკრაინის ლიდერმა განმარტა, რომ ქვეყანაში საკანონმდებლო ცვლილებებისა და რეფორმების პროცესი პარალელურად მიმდინარეობს და კანონების არარსებობა რეფორმების შემაფერხებელი მიზეზი არ უნდა გახდეს.
