ბიუროს სხდომაზე, 8-10 ივლისის რიგგარეშე სხდომების დღის წესრიგის შესახებ იმსჯელეს. დღის წესრიგში 80-მდე განსახილველი საკითხია შეტანილი. დაგეგმილია „საქართველოს სისხლის სამართლის კოდექსში ცვლილების შეტანის შესახებ“ კანონპროექტის პირველი მოსმენით განხილვა.
პირველი მოსმენით განიხილება საქართველოს ორგანული კანონის პროექტი „საქართველოს ორგანულ კანონში „ადგილობრივი თვითმმართველობის კოდექსი“ ცვლილების შეტანის შესახებ“, რომელიც ადგილობრივი თვითმმართველობის განხორციელებაში მოქალაქეთა მონაწილეობის დამატებით ფორმებს განსაზღვრავს. განისაზღვრება დასახლების საერთო კრების არსი, ფუნქციები და უფლებამოსილებები, საერთო კრების რჩეულის არჩევის წესი და მისი უფლებამოსილებები, საერთო კრებაში სათათბირო ხმის უფლებით მონაწილეობის უფლების მქონე პირები.
ბიუროს გადაწყვეტილებით, დღეს, პარლამენტი საქართველოს პარლამენტის რეგლამენტის პროექტს „საქართველოს პარლამენტის რეგლამენტში ცვლილების შეტანის შესახებ“ პირველი მოსმენით განიხილავს.
ცვლილების თანახმად, საქართველოს პარლამენტის პლენარული და საკომიტეტო სხდომების გაცდენის საპატიო მიზეზების ჩამონათვალიდან „ოჯახური მდგომარეობის გამო“ სხდომის გაცდენა ამოღებული იქნება.
„სახელმწიფო უსაფრთხოების სამსახურის შესახებ“ კანონპროექტსა და მის თანმდევ პროექტებს, რომელიც პოლიციისა და სახელმწიფო უსაფრთხოების ორგანოების ორგანიზაციულ გამიჯვნას ითვალისწინებს, დეპუტატები მესამე მოსმენით განიხილავენ.
პლენარული სხდომების დღის წესრიგში აგრეთვე, შეტანილია საქართველოს ენერგეტიკისა და წყალმომარაგების მარეგულირებელი ეროვნული კომისიის საქმიანობის შესახებ 2014 წლის წლიური ანგარიშის მოსმენა.
