საპროცედურო საკითხთა და წესების კომიტეტის სხდომაზე კომიტეტის წევრებმა ერთხმად დაუჭირეს მხარი პარლამენტის წევრის - ოთარ ჩრდილელის საპროცედურო საკითხთა და წესების კომიტეტის თავმჯდომარის მოადგილედ არჩევის საკითხს.
კომიტეტის სხდომაზე განიხილეს ასევე პარლამენტის წევრების: ვახტანგ ხმალაძისა და თამარ კორძაიას საკანონმდებლო ინიციატივის წესით წარმოდგენილ „საქართველოს პარლამენტის რეგლამენტში ცვლილების შეტანის შესახებ“ საქართველოს პარლამენტის რეგლამენტის პროექტი.
ვახტანგ ხმალაძის განცხადებით, პროექტის მიღების მიზანია, „სახელმწიფო უსაფრთხოების შესახებ“ კანონპროექტში არსებული ისეთი საკითხების მარეგულირებელი ნორმების საქართველოს პარლამენტის რეგლამენტში ასახვა, როგორიცაა სამსახურის უფროსის თანამდებობაზე დანიშვნა, თანამდებობიდან გადაყენება, უფლებამოსილების ვადამდე შეწყვეტა და სამსახურის უფროსის პარლამენტის წინაშე ანგარიშვალდებულება. კომიტეტის წევრებმა მხარი დაუჭირეს საკითხის პლენარულ სხდომაზე გატანას.
