სასამართლო რეფორმის საკანონმდებლო ცვლილებების პაკეტი დღეს პარლამენტს წარედგინა.
იუსტიციის სამინისტროს მიერ "საერთო სასამართლოების შესახებ" კანონში მომზადებული ცვლილებებით, უქმდება უზენაესი სასამართლოს თავმჯდომარის მოადგილის, ასევე სააპელაციო სასამართლოს თავმჯდომარის მოადგილეების ინსტიტუტი.
უზენაესი სასამართლოს მოსამართლეთა რაოდენობა 28 წევრით განისაზღვრება, ნაცვლად პლენუმის მიერ რაოდენობის განსაზღვრისა.
ახლებურად ყალიბდება სააპელაციო და საქალაქო სასამართლოების თავმჯდომარეთა თანამდებობაზე გამწესების საკითხი. კერძოდ, იუსტიციის უმაღლესი საბჭოს მიერ დანიშვნის ნაცვლად, მათ შესაბამისი სასამართლოების მოსამართლეები აირჩევენ.
პროექტით, საკანონმდებლო დონეზე განისაზღვრება მოსამართლეობის კანდიდატთა შერჩევის კრიტერიუმები, ასევე იუსტიციის უმაღლესი საბჭოს შესაბამისი გადაწყვეტილების გასაჩივრების წესი და სხვა.
კანონპროექტი "საერთო სასამართლოების შესახებ" კანონის გარდა, ცვლილებებს კიდევ სხვა ათ კანონში იწვევს და იგი პარლამენტის ბიუროს წარედგინა.
