თბილისის მერმა დავით ნარმანიამ სტიქიის შედეგად I კატეგორიის დაზარალებულთათვის კომპენსაციის გაცემის პროცედურები დეტალურად განმარტა. მერის განცხადება „პირველი სტუდიის“ ეთერში გაჟღერდა.
"საკრებულო დაამტკიცებს წესს და მეორე დღეს, ანუ ორშაბათს, ეს წესი გამოქვეყნდება, რაც ნიშნავს იმას, რომ ჩვენ უკვე ხელთ გვექნება დოკუმენტი, რომლითაც დავიწყებთ შესაბამის პროცედურებს. პირველი და უმნიშვნელოვანესი რაც არის, საშუალო საბაზო ღირებულების დადგენა რომელიც რამდენიმე დღის განმავლობაში დადგინდება, პარალელურ რეჟიმში შესაძლებელია გაიცეს ფულადი დახმარება ოჯახის სულადობიდან გამომდინარე. ჩვენ ჩავწერეთ წესში რომ 1500-დან 8000 ლარამდე მიეცემა თითეულ ოჯახს ფულადი დახმარება საოჯახო ნივთების და სხვა დამხმარე საშუალებების შესაძენად. ბინის არჩევანი მათ შეუძლიათ თვითონ გააკეთონ. ანუ თვითონვე შეუძლიათ მოძებნონ ბინა, შემდგომ მოდიან ჩვენთან შესაბამისი დოკუმენტაციით, ჩვენს ე.წ. „ს–ქროუ“ ანგარიშზე, საიდანაც არავის არ შეუძლია ფული გამოიტანოს, ამ ადამიანის გარდა, ამ ანგარიშზე იქნება ეს თანხა გაყინული. როგორც კი კონტრაქტს მოაწერენ ხელს ბინის მეპატრონესთან, მაშინვე გადაერიცხება მას ეს თანხა", - განმარტა დავით ნარმანიამ.
