პრეზიდენტის მრჩეველი ეკონომიკურ საკითხებში გიორგი აბაშიშვილი აცხადებს, რომ საქართველოსა და თურქმენეთის ურთიერთობები სრულიად ახალ სტადიაზე გადავიდა. პრეზიდენტის ადმინისტრაციაში გამართულ ბრიფინგზე, სადაც მან თურქმენეთის პრეზიდენტის გურბანგული ბერდიმუხავედოვის საქართველოში ვიზიტი შეაჯამა, ასევე აღნიშნა, რომ განსაკუთრებული ინტერესი იქნა გამოხატული სატრანსპორტო, ეკონომიკური, ლოჯისტიკური თანამშრომლობის სფეროში თანამშრომლობაზე.
„ბუნებრივია, როდესაც თურქმენეთის მხრიდან ასეთი მაღალი ინტერესი არსებობს, საჭიროა საქართველოში უფრო აქტიური ქმედებების განხორციელება, უფრო აქტიური მუშაობა ინფრასტრუქტურული პროექტების მიმართულებით, რათა საქართველომ ის შესაძლებლობა, რომელიც პრეზიდენტების დონეზე უმაღლესი პოლიტიკური გადაწყვეტილების დროს იქნა მიღებული, ეფექტიანად გამოიყენოს“, - აღნიშნა პრეზიდენტის მრჩეველმა.
მისივე განმარტებით, ერთ-ერთი ყველაზე მნიშვნელოვანი მიმართულება თურქმენეთისა და ევროკავშირის მოლაპარაკებებია თურქმენული გაზის ევროკავშირში გადაადგილების თვალსაზრისით. აბაშიშვილის თქმით, საქართველო აღნიშნული პროექტის შემდგომი რეალიზების კუთხით აქტიურ ჩართულობას იწყებს, რაც საქართველოს ბუნებრივი აირის ტრანსპორტირების მიმართულებით დამატებით უმნიშვნელოვანეს სარგებელს მოუტანს.
ასევე, საქართველო კიდევ უფრო მეტ როლს შეასრულებს ევროკავშირის ენერგოუსაფრთხოების უზრუნველყოფის მიმართულებით.
აბაშიშვილის ინფორმაციით, საქართველოს რამდენიმე ტიპის შეთავაზება აქვს. ერთ-ერთი მნიშვნელოვანი მიმართულება კი ტრანსატლანტიკური გაზსადენის ე.წ. აგლის პროექტია, რომელიც რუმინეთის, უნგრეთის და საერთო ჯამში დასავლეთ ევროპის მიმართულებით თურქმენული გაზის გადაზიდვას ითვალისწინებს.
