თავდაცვის მინისტრი თინათინ ხიდაშელი მიიჩნევს, რომ დასავლეთმა საქართველოსა და უკრაინისთის მეტი უნდა გააკეთოს. როგორც მან შვეიცარიულ გერმანულენოვან გამოცემა „ციურიხის ახალი გაზეთისთვის“ მიცემულ ინტერვიუში განაცხადა, დასავლეთმა უნდა გამოხატოს პოლიტიკური ნება და აჩვენოს, რომ საქართველოს გვერდით ყოფნა ნამდვილად სურთ.
„თბილისში ჩემი საცხოვრებელი ბინის ფანჯრიდან კავკასიონს ვხედავ. კარგი ხილვადობის პირობებში რუსული დროშების დანახვაც შესაძლებელია. გულწრფელად ვფიქრობ და ვამბობ, რომ დასავლეთმა საქართველოსა და უკრაინისთვის მეტი უნდა გააკეთოს. ჩვენ არ ვითხოვთ, რომ ჯარისკაცებმა საქართველოში იბრძოლონ ან მოსკოვში ბომბები ისროლონ. უბრალოდ, ვამბობთ, პოლიტიკური ნება გამოხატონ და გვაჩვენონ, რომ ჩვენი გვერდით ყოფნა ნამდვილად სურთ“, - განაცხადა ხიდაშელმა.
კითხვაზე - თუ საქართველო დასავლეთთან მეტად ინტეგრაციას ვეღარ მოახერხებს, ხომ არ გამოიწვევს ეს პრორუსული ძალების გაძლიერებას, ხიდაშელმა აღნიშნა, რომ საქართველოს მოსახლეობის უმრავლესობას რუსეთის ნოსტალგია არა აქვს, თუმცა შეიმჩნევა პროდასავლური ძალების გარკვეული უკუსვლა.
,,ამ ფონზე, გაურკვეველი პოლიტიკური ძალები ჩნდებიან ხოლმე. ზოგადად, არა მხოლოდ ევროატლანტიკურ ინტეგრაციაზე ვსაუბრობთ, არამედ ქვეყანაში მიმდინარე რეფორმებზე, რომელიც უნდა გაგრძელდეს, მათ შორის, მედიის თავისუფლების სფეროში და სასამართლო სისტემაში”, - დასძინა ხიდაშელმა.
