თბილისის მერი დავით ნარმანია უმაღლეს შეფასებას აძლევს შემუშავებულ დოკუმეტს, რომელიც შეიცავს სტიქიით დაზარალებულთათვის კომპენსაციის გაცემის წესს. როგორც დავით ნარმანია „2030“-ის ეთერში განაცხადა, „ესეთი დოკუმენტი არც არასდროს არ შექმნილა“.
„დოკუმენტი არის ღრმაშინაარსიანი და მრავლისმომცველი. ხაზგასმით მინდა ავღნიშნო, რომ ესეთი დოკუმენტი არც არასდროს არ შექმნილა. ჩვენ ეს დოკუმენტი გავაკეთეთ იმისათვის, რომ მაქსიმალურად ობიეტურად განაწილდეს შესაბამისი რესურსები. რომელიც სტიქიის შედეგების სალიკვიდაციოდ არის შემოწირული ფიზიკური და იურიდიული პირების მიერ“, - განაცხადა ნარმანიამ.
ამასთანავე თბილისის მერმა კომპენსაციის წესები განმარტა. დოკუმენტის მიხედვით, დაზარალებულთა საცხობრებელი ფართები 2 კატეგირიად დაიყოფა: სახლები, რომლებიც მთლიანად განადგურებულია, და სახლები, რომლებიც რეაბილიტაციას ექვემდებარება.
„მეორე კატეგორიასთან დაკავშირებით რაიონულ გამგეობებს მივეცით დავალება, რომ დაფინანსების ფარგლებში მოახდინონ შესაბამისი საამშენებლო-სარემონტო სამუშაოების წარმოება. ხოლო რაც შეეხება პირველი კატეგორიის ოჯახებს, რომლებიც ვერასდროს დაბრუნდებიან თავიანთ სახლებში, აქ საუბარია ამ ოჯახების საშუალო საბაზრო ღირებულების ბინის ანაზღაურებაზე“, - განმარტა თბილისის მერმა.
