თბილისის ვიცე-მერმა ირაკლი ლექვინაძემ სტიქიისგან დაზარალებულების კომპენსირების სქემა „არჩევანის“ ეთერში განმარტა. ამავე დროს, როგორც მერის მოადგილემ აღნიშნა, ეს არ არის ზარალის ანაზრაურების წესის საბოლოო ვარიანტი.
"კონკრეტული ექსპერტიზა (ვარაუდობ, რომ ეს „სამხარაული“ იქნება) დაადგენს ამ სტიქიის ზონიდან 1,5 კილომეტრიან რადიუსში, რა ღირს უძრავი ქონება და სულადობის მიხედვით მოხდება გადაანგარიშება: ეს იქნება 45, 70 თუ 110 კვ/მ [ფართი]. ამის შედარება მოხდება ამ ადამიანების უძრავი ქონების ღირებულებასთან და, თუ მოხდება ამათ შორის ჩავარდნა, ეს ჩავარდნა დაკონპენსირდება.
პირობითად, თქვენ გქონდათ 100 კვადრატული მეტრი ბინა და, პირობითად, კვადრატული მეტრი არის შეფასებული 1000 დოლარად, ე.ი. თქვენი ბინა შეადგენს 100 000 დოლარის ღირებულებას. მაგრამ ჩვენ ვამბობთ, რომ 2-სულიან ოჯახს ეკუთვნის 45 კვ/მ, რომელიც, ასევე 1000 დოლარზე რომ ვიანგარიშოთ, გამოდის 45 000. 100 000-ს გამოკლებული 45 000 იქნება 55 000 და ეს სხვაობა ამ ადამიანებს დაუკომპენსირდებათ, რომ პროცესი იყოს სამართლიანი და ყველამ მიიღოს იმდენი და ადეკვატური, რაც ჰქონდათ სტიქიამდე“, - განაცხადა ირაკლი ლექვინაძემ.
ვიცე-მერის მონაცემებით, სტიქიის შედეგად 161 ოჯახია დაზარალებული.
