პარლამენტის ადამიანის უფლებათა დაცვის კომიტეტმა მარიხუანის მოხმარების გამო პატიმრობის გაუქმებას მხარი დაუჭირა, თუმცა მარიხუანის მოხმარების გამო სისხლის სამართლის კოდექსით გათვალისწინებული სხვა სანქციები ძალაში რჩება.
კომიტეტის სხდომაზე კანონპროექტის ამ ნაწილს ხმა მისცა 6-მა დეპუტატმა, ერთი – ფრაქცია „ქართული ოცნება – კონსერვატორების” თავმჯდომარის მოადგილე მერაბ კაჭახიძე კი წინააღმდეგ წავიდა.
გარდა ამისა, კომიტეტმა ხაჩიძის კანონპროექტის ის ნაწილი გაიზიარა, რომელიც მარიხუანის მოხმარების პირველ შემთხვევას ეხება.
ხაჩიძის საკანონმდებლო ინიციატივით, ადმინისტრაციულ სამართალდარღვევათა კოდექსის 45-ე მუხლში დაგეგმილი ცვლილების მიხედვით, აღნიშნული ნარკოტიკული საშუალებების პირველ ჯერზე მოხმარება 500 ლარის ნაცვლად 100 ლარით დაჯარიმდება, ხოლო განმეორების შემთხვევაში – 300 ლარით. ავტორის ინიციატივით, ასევე ჩამოთვლილ მსუბუქ ნარკოტიკებზე (კანაფი, კანაფის ფისი და მარიხუანა) არ გავრცელდება 15-დღიანი ადმინისტრაციული პატიმრობა.
