საქართველოს ენერგეტიკისა და წყალმომარაგების მარეგულირებელი ეროვნული კომისია კიდევ ერთხელ განმარტავს, რომ კომისიის მიერ მიღებული ნებისმიერი გადაწყვეტილება საჯაროა და ხელმისაწვდომია ყველა დაინტერესებული პირისათვის.
საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის 2015 წლის 30 ივნისის სხდომაზე, საქართველოს ენერგეტიკისა და წყალმომარაგების მარეგულირებელი ეროვნული კომისიის 2014 წლის საქმიანობის ანგარიშის მოსმენისას, განცხადებები გაკეთდა, რომ შპს „მცხეთის წყალისათვის“ ტარიფის დადგენასთან დაკავშირებით ინფორმაცია წინასწარ არ იყო გასაჯაროებული, რაც არ შეესაბამება სიმართლეს.
შპს „მცხეთის წყალის“ სატარიფო მომართვის საფუძველზე, საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ 2015 წლის 15 იანვარს დაიწყო საჯარო ადმინისტრაციული წარმოება, რომლის შესახებ ინფორმაცია განთავსდა კომისიის ვებ გვერდზე: http://gnerc.org/ge/public-works/sajaro-warmoeba/14600.
მას შემდეგ, რაც კომისიის აპარატის ტარიფებისა და ეკონომიკური ანალიზის დეპარტამენტის მიერ შესწავლილ იქნა შპს „მცხეთის წყალის“ სატარიფო განაცხადი და თანდართული დოკუმენტაცია, კომისიამ 2015 წლის 20 მაისისათვის ჩანიშნა საკითხის საჯარო განხილვა და კომისიის საჯარო სხდომის დღის წესრიგი განთავსდა კომისიის ვებ გვერდზე 2015 წლის 7 მაისს. http://gnerc.org/ge/sadjaro-skhdomebi/sadjaro-skhdomebis-dghis-tsesrigi/sxdomis-dgiswesrigi/15613
ინფორმაცია საჯარო სხდომის გამართვის შესახებ შპს „მცხეთის წყალისათვის“ ტარიფის დადგენასთან დაკავშირებით გავრცელდა მედიასაშუალებებით. https://www.youtube.com/channel/UCGpHxkTIl5i-ODjYdYfvTug
მიმდინარე წლის 20 მაისის საჯარო სხდომას და შესაბამისად, შპს „მცხეთის წყალისათვის“ ტარიფის დადგენის შესახებ საკითხის განხილვას ესწრებოდნენ მედიასაშუალებები და სხვა დაინტერესებული პირები.
2015 წლის 20 მაისს, მას შემდეგ რაც კომისიამ საჯაროდ იმსჯელა შპს „მცხეთის წყალისათვის“ ტარიფის დადგენის თაობაზე და მიიღო გადაწყვეტილება, კომისიის საზოგადოებასთან ურთიერთობის დეპარტამენტმა მომზადა და გავრცელა შესაბამისი პრეს-რელიზი, ასევე კომისიის გადაწყვეტილების შესახებ ინფორმაცია გავრცელდა მედიასაშუალებებით.
