შინაგან საქმეთა სამინისტროს მონაცემებით, საქართველოს 40-მდე მოქალაქე ჩართულია „ისლამური სახელმწიფოს“ საქმიანობაში. ამის შესახებ შს მინისტრის მოადგილემ არჩილ თალაკვაძემ „2030“-ის ეთერში განაცხადა.
„ჩვენი მონაცემებით, საქართველოდან დაახლოებით 40 ადამიანი არის წასული და ჩართულია „ისლამური სახელმწიფოს“ საქმიანობაში, მათ შორის „ ის“-ის რამდენიმე ლიდერი: თარხან ბათირაშვილი, მუსლიმ მარგოშვილი და სხვები“, - განაცხადა არჩილ თალაკვაძემ
ამასთანავე შს მინისტრის მოადგილემ ევროპარლამენტის სტატისტიკაზე დაყრდნობით აღნიშნა, რომ საქართველოს სპეცსამსახურების ეფექტურობის შედეგიანობას ეს რიცხვი არ ასახავს.
„ბელგიის ყოველ მილიონ მოსახლეზე 40 ადამიანი არის წასული საბრძოლველად „ისლამურ სახელმწიფოში“, საფრანგეთიდან 2 მილიონ მოსახლეზე 18 მოქალაქე წასულია. თუ ვიმსჯელებთ ევროპარლამენტის ანგარიშში შესული ამ სტატისტიკით, არ შეიძლება ითქვას, რომ საქართველოში ეს პრობლემა არის ძალიან მზარდი და სახელმწიფო არ არის ეფექტური, პირიქით, მე ვიტყოდი, რომ ის ძალიან ქმედითია“, - აღნიშნა არჩილ თალაკვაძემ.
