ყოფილი თავდაცვის მინისტრი ბაჩო ახალაია პოლკოვნიკ სერგო თეთრაძის წამების ბრალდებასთან დაკავშირებით კომენტარს ციხიდან აკეთებს. მისი განცხადება „იმედის კვირის“ სიუჟეტში გავიდა.
„ახლაც ყველამ იცის, როგორც ჩანს, მას გული გაუსკდა და ამიტომ დადგა სიკვდილი. ხელისუფლებამ ეს ვერსია გადაამოწმა, ჩაატარა ექსგუმაცია, დამატებითი ექპერტიზა და დაადგინა, რომ სიკვდილის მიზეზი სწორედ ეს იყო, ხოლო გაუპატიურება საერთოდ გამოირიცხა. და ახლა ჩემთვის სრულიად აუხსნელია, რატომ აყენებენ ადამიანს ისეთ შეურაცხყოფას, როგორც აღმოჩნდა, რომ მისთვის არავის მიუყენებია სიცოცხლეში. ამიტომაც მოიგონეს ახლა რაღაც ცელოფნები, რომელიც ამ წლების განმავლობაში არავის სმენია - თუ არ არის გაუპატიურება, რამე მიახლოებული ძალადობა მაინც უნდა ამტკიცონ“, - განაცხადა ბაჩო ახალაიამ.
შეგახსენებთ, პოლკოვნიკ სერგო თეთრაძის მეუღლე ნანა თეთრაძე მისი მეუღლის წამებით მოკვლაში ბაჩო ახალაიასა და მეგის ქარდავას ადანაშაულებს. სასამართლო პროცესზე მან აღნიშნა, რომ სერგო თეთრაძეს აწამებდნენ და პოლიეთილენის ცელოფნით გუდავდნენ.
